نئی بیت بازی - حصہ دوم

آواز کیا، کہ شکل بھی پہچانتا نہیں
غافل ہمارے حال سے وہ اِس قدر ہوا

 

اُس چشمِ مے نواز و فسُوں ساز نے ہمیں
اک دید التفات عنایت کبھی نہ کی

 

اپنی گلی میں اپنا ہی گھر ڈھونڈھتے ہیں لوگ
امجد یہ کون شہر کا نقشہ بدل گیا

 

ڈوبتی شام کے ویران سمے کی صورت
تھام رکھی ہے تیری ایک نشانی دل نے

 

جو بھی ہونا تھا ہوا ، بھول ہی جاؤ سب کچھ
داستانِ گل و بلبل نہ سناؤ مجھ کو

 

ابھی سے کیوں چھلک آئے تمہاری آنکھ میں آنسو
ابھی چھیڑی کہاں ہے داستانِ زندگی میں نے

 

شب کو مئے خوب سی پی صبح کو توبہ کر لی
رند کے رند رہے ہاتھ سے جنت نہ گئی

 

زندگی ذوقِ نمو، ذوقِ طلب، ذوقِ نظر
انجمن ساز بھی ہے، گرمِ تگ و تاز بھی ہے

 

تیرے سرو قامت سے اے قد آدم
قیامت کے فتنے کو کم دیکھتے ہیں

 

بنا کر فقیروں کا ہم بھیس غالبؔ
تماشائے اہلِ کرم دیکھتے ہیں

 

بندہ پرور جو ہم پہ گزری ہے
ہم بتائیں تو کیا تماشا ہو

 

تو ڑ کر عہد و کرم نا آشنا ہو جائیے
بندہ پرور جائیے اچھا خفا ہو جائیے

 

برہم جو شکیل ان کی نظر ہو تو بلا سے
دیکھوں وہ کہاں مجھ سے خفا ہو کے رہے گی

 

چلا جو تیر نظر نیم کش تو کیا حاصل
مزا تو جب ہے کہ سینے کے آر پار چلے

 

ظرف کی بات ہے کانٹوں کی خلش دل میں لئے
لوگ ملتے ہیں ترو تازہ گلابوں کی طرح

 

سینے کا داغ ہے وہ نالہ کہ لب تک نہ گیا
خاک کا رزق ہے وہ قطرہ کہ دریا نہ ہوا
غالب

 

آنکھ جو کچھ دیکھتى ہے‌, لب پہ آسکتا نہیں
محو حیرت ہوں کہ دنیا کیا سے کیا ہو جائے گی

 

نظر میں شوخی، ادا میں مستی، لبوں پہ ہلکی سی مسکراہٹ
رکی ہے دونوں جہاں کی رونق، جو اُس نے نظریں جُھکا کہ دیکھا