یہ آرزو نہیں کہ مجھے سیم و زر ملے ۔ خالد محمود خالد نقشبندی مجددی

صلی اللہ علیہ وآلہ وسلم
یہ آرزو نہیں کہ مجھے سیم و زر ملے
سب کچھ ہی وار دوں جو ترا سنگِ در ملے

مانگو دعا کہ قربِ شہِ بحر و بر ملے
نعمت یہی ہے صاحبِ نعمت اگر ملے

آسان نہیں ہے جلوہء سرکارﷺ دیکھنا
اس کے لیے ہے شرط کہ تابِ نظر ملے

ہم کو بھی دردِ عشقِ محمدﷺ کی بھیک دے
یارب ہمیں بھی صدقئہ خیرالبشرﷺ ملے

شامل کرو دعا میں وسیلہ درود کا
گر چاہتے ہو تم کہ دعا کو ثمر ملے

جس انجمن میں ان کا سگِ بے ہنر گیا
اٹھ کر بڑے تپاک سے اہلِ ہنر ملے

یہ میری آرزو ہے رہے آرزو کی لاج
سوز و گدازِ عشق ملے چشمِ تر ملے

جو غمِ شبِ فراق سے خالدؔ ہوئے طلوع
ان کے جلو میں ہم کو تو شمس و قمر ملے
-------
خالد محمود خالد نقشبندی مجددی
قدم قدم سجدے ۔ مجموعہ نعت
صفحہ نمبر۔ 126​

 

اللہ تعالیٰ آپ کوبھی جزائے خیر عطا کرے آمین