یا ربّ سُنائیں ہم کسےاب مُدعائے دل

یا ربّ سُنائیں ہم کسےاب مُدعائے دل
کوئی نہیں جہان میں حاجت روائے دل

کیا کہیے بحرِ شوق میں اب ماجرائے دل
دل ہے سفینہ اور وہ ہیں ناخدائے دل

آیئنہ حیات کی تکمیل کے لیے
لازم ہے کائنات میں صِدق و صفائے دل

دل اور درد دونوں میں اک ربطِ خاص
دل آشنائے درد ہے ، درد آشنائے دل

ہر ٹِیس جس کی تیری طرف مُلتَفِت کرے
یا ربّ ! وہ درد چاہیے مجھ کو برائے دل

دنیائے دل کا حال نہ پوچھو فراق میں
مصروفِ انتظار ہیں صبح و مسائے دل

صد ہا اٹھائیں دل کی بدولت صعوبتیں
دیکھو نصؔیر اور ابھی کیا کیا دکھائے دل

نصیرِ مِلّت پیر سیّد نصیر الدین نصؔیر گولڑوی ؒ