یارب مرے جیون کو مدینے کی ہوا دے ۔۔ سبحان الدین گل بخشالوی

یارب مرے جیون کو مدینے کی ہوا دے
توحید کے نغمے مری ہستی کے سُنا دے

رحمت تو تری عام ہے، لیکن مرے مولا
قدرت کے نظارے بھی مدینے میں دکھا دے

محبوبؐ مرے دل میں ہی رہتا تو ہے پھر بھی
بس رو ضۂ اقدس مرے سینے سے لگا دے

میں گنبد خضریٰ کے نظاروں میں نہاؤں
مولا تو مرا گھر بھی مدینے میں بنا دے

ہے نور محمدﷺ مری آنکھوں میں تو مولا!
خوشبوئے محمدﷺ بھی مرے دل میں بسادے

بس ایک ہی خواہش ہے مرے پیارے نبیﷺ سے
جنت میں وہ کوثر مجھے ہاتھوں سے پلا دے

اعزاز بڑا اس سے بھلا کیا ہو کسی کا
جیون کی اگر شام مدینے میں خدا دے

برسات ہو رحمت کی مدینے میں خدا یا
لہروں میں کرم کے تو ذرا گلؔ کو بہا دے
٭٭٭
گلستانِ نعتﷺ ۔۔ سبحان الدین گل بخشالوی
​

 

اللہ تعالیٰ آپ کو بھی جزائے خیر عطا کرے آمین