ہیں طیبہ کی جواں راہیں ( از شاعر علی شاؔعر ۔ کراچی)

ہیں طیبہ کی جواں راہیں
بہارِ بے خزاں راہیں
​

ثناء خوانی سے آقا کی
ملیں رحمت نشاں راہیں​

​

ترے انوار سے آقا
ہیں کیسی ضوفشاں راہیں​

​

کہیں راہِ مدینہ سی
نہیں ہیں مہرباں راہیں​

​

تمہارے پاؤں چومے تو
ملیں جنت نشاں راہیں​

​

ہیں آقا کے پسینے سے
مثالِ گلستاں راہیں​

​

چلے چپ چپ مسافر تو
بنیں اکثر زباں راہیں​

​

تو سر پر خاکِ طیبہ ڈال
تجھے دیں گی اماں راہیں​

​

جہاں مسکن ہے آقا کا
یہ پہنچیں گی وہاں راہیں​

​

مدینے کے سفر میں دیں
زمین و آسماں راہیں​

​

چمکتی ہیں مدینے کی
مساجد، جالیاں، راہیں​

​

بتاؤ ہیں کہاں شاعؔر
برنگِ کہکشاں راہیں​

مجموعہ کلام : نور سے نور تک​

 

اللہ تعالیٰ آپ کو بھی جزائے خیر عطا کرے آمین