ہیچ ہیں خورشید و انجم نقش پا کے سامنے ۔ رمز جلال آبادی.

ہیچ ہیں خورشید و انجم نقش پا کے سامنے،
ماہ تاباں کیا ہے حسن مصطفی کے سامنے.

حاکم دوراں کھڑے ہیں ہاتھ میں کاسہ لیے،
ہر گھڑی شاہ مدینہ کی عطا کے سامنے.

دشت کو گلزار کردیں اپنے خوں سے سینچ کر،
مشکلیں کیا چیز ھیں اہل وفا کے سامنے.

انکے حسن ناز کی ھے بھیک یہ سارا جہاں،
"کائناتِ حسن کیا ھے مصطفے کے سامنے".

تو گناہوں کی جو چاہے حشر میں دینا سزا،
یا خدا رسوا نہ کرنا مصطفی کے سامنے.

ہم کو حاصل ہے شہ دیں کی غلامی کا شرف،
تاجور بھی سر جھکا لیتے ہیں آ کے سامنے.

رمز جس کو دیکھنی ہو خلد زیر آسماں،
دیکھ لے وہ گنبد خضری کو جا کے سامنے.

رمز جلال آبادی.​

 

اللہ تعالیٰ آپ کو بھی جزائے خیر عطا کرے آمین