ہو کرم مولا کہ اب تو ہو گئے غم بیشمار ۔۔ بشریٰ سعید

ہو کرم مولا کہ اب تو ہو گئے غم بیشمار
میں سناؤں کس کو جاکر حالِ دل اب بار بار

مجھ پہ بھی ہو گی عنایت آج اُن کے لطف کی
کاسہ شفقت سے بھریں گے اب تو میرے تاجدار

بس محمدﷺ کے تو صدقے میں ملے گی ہر خوشی
بخش دے گا ہر خطا میری مرا پروردگار

دل بھی ہو جاۓ گا روشن ان کے جلووں سے مرا
کاش کر لوں میں بھی خوابوں میں زیارت ایک بار

آپﷺ کے در پہ ملا ہے چین ہر بے چین کو
مل سکا نہ اس جہاں میں آپ جیسا غمگسار

تیری مدحت میں سنائیں گے یہ نعتیں صبح و شام
آنکھوں میں ہیں آنسو تو دل میں چھپے ہیں غم ہزار

تیرے دل کی ہو گی بشریٰ جانے کب پوری مراد
تو بھی دیکھے گی کبھی جا کر مدینے کی بہار

بشریٰ سعید​

 

اللہ تعالٰی آپ کو بھی جزائے خیر عطا کرے آمین