ہماری وہ اب زندگانی نہیں ہے

بہزاد لکھنوی
ہماری وہ اب زندگانی نہیں ہے
جوانی میں کیف جوانی نہیں ہے
جو آنکھوں سے بہتا ہے اشکوں کی صورت
یہ پانی حقیقت میں پانی نہیں ہے
طبیعت ہے بے رنگ آنکھیں افسردہ
جوانی کے دن ہیں جوانی نہیں ہے
غم جاوداں دے مجھے دینے والے
غم ہجر تو جاودانی نہیں ہے
غم ہجر آ تجھ کو میں سینے میں رکھ لوں
مقدر میں اب شادمانی نہیں ہے
میں بہزاد گو ہوں شکار محبت
مرے پاس کوئی نشانی نہیں ہے​