ڈرون کون روکے گا ؟

ڈرون کون روکے گا ؟​

.... فاضل جمیلی ....

خیبر پختونخوا میں عمران خان کی تحریک انصاف نے حکومت بنا لی ہے۔ مرکز میں نوازشریف کی مسلم لیگ ہے۔ اقتدار میں آنے سے قبل دونوں جماعتیں شمالی وزیرستان میں ہونے والے امریکی ڈرون حملوں کی سخت مخالف رہی ہیں۔ عمران خان باالخصوص ڈرون حملوں کے حوالے سے انتہائی سخت موقف رکھتے ہیں ۔ ان کا کہنا ہے کہ نوازشریف ڈرون حملے روکنے یا ڈرون گرانے کا اعلان کریں۔ کیونکہ عوام نے ان حملوں کی مخالف جماعتوں کو ووٹ دے کر حکومت میں بھیجا ہے۔ اب پرویز مشرف کی پالیسیاں نہیں چلنی چاہیں ۔ لیکن عمران خان کی صوبائی حکومت اپنے قائد کے ان خیالات کو عملی جامہ کیسے پہنا سکتی ہے۔ زمینی حقائق کو دیکھا جائے تو اس طرح کا کوئی بھی فیصلہ کرنے یا عملی اقدام اٹھانے کا اختیار صوبائی حکومت کے دائرہ ء اختیار میں نہیں آتا۔نہ ہی خیبر پختونخوا کی حکومت نیٹو کی سپلائی لائن روکنے کا اختیار رکھتی ہے۔ دونوں جماعتیں طالبان سے مذاکرات کی بھی حامی رہی ہیں لیکن خیبر حکومت بنتے ہی ڈرون حملے کی پہلی سلامی میں طالبان رہنما ولی الرحمان کی ہلاکت کے بعد طالبان نے حکومت سے مذاکرات کی پیش کش واپس لے لی ہے۔ اس تناظر میں نوازشریف کے لیے ڈرون حملے رکوانے اور طالبان سے مذاکرات کو عملی جامہ پہنانے کے حوالے سے انتہائی مشکلات کا سامنا ہو سکتا ہے۔بجلی بحران پر قابو پانے کے دوٹوک وعدے سے وہ پہلے ہی پھر چکے ہیں۔ اب ان کا کہنا ہے کہ حکومت بنتے ہی بجلی آ جائے گی اس کی امید ہر گز نہ رکھی جائے ۔ تو کیا یہ سمجھ لینا چاہیے کہ نوازشریف کی حکومت بنتے ہی ڈرون حملے رک جائیں گے ۔ اس طرح کی بھی کوئی اُمید نہ رکھی جائے ؟ خارجہ پالیسی کے حوالے سے نوازشریف کے بااعتماد ساتھی کہہ چکے ہیں کہ خارجہ پالیسی میں کسی تبدیلی کو فوری طور پر کوئی امکان نہیں ہے ۔عمران خان خارجہ پالیسی کو اپنی مرضی و منشا کے مطابق تبدیل کروانے میں کہاں تک کامیاب ہو سکتے ہیں جب کہ مرکز میں ان کی پوزیشن اپوزیشن لیڈر تک بننے کی نہیں ہے ۔ لگتا یہی ہے کہ جب تک امریکی قیادت میں نیٹو فورسز ازخود افغانستان سے رُخصت نہیں ہوجاتیں۔ ڈرون اسی طرح برستے رہیں گے اور ہمارے قومی رہنماؤں محض بیان بازی کی حد تک ایک دوسرے پر گرجتے رہیں گے ۔