پھر سے اک بار حسیں میرا مقدر ہو گا ۔۔۔محمد عمران شریف

پھر سے اک بار حسیں میرا مقدر ہو گا
درِ اقدس کی طرف جانا میسر ہو گا

اسمِ سرکار ﷺ جو بن جائے لبوں کی زینت
منزلیں پاس ہر اک رستہ منور ہو گا

ہاتھ میں تھام کے کشکول چلے آتے ہیں
جن کو معلوم ہے ہر وقت کھلا در ہو گا

خود کو جب دیکھوں گا میں روضہ ء سرور ﷺ پہ کھڑا
آنکھ نمناک مری ہو گی جھکا سر ہو گا

ہاں جنہیں آپ ﷺ سے نسبت ہے تہہِ خاک ان کو
خوف ہو گا نہ کوئی خطرہ نہ کچھ ڈر ہو گا

سبز گنبد سا حسیں جلوہ گہِ نورِ فلک
دوسرا اور کہاں کوئی زمیں پر ہو گا

ذکرِ سرکار ﷺ کی خوشبو سے مرا دل عمران
جب تلک سانس چلے گی یہ معطر ہو گا
------
محمد عمران شریف​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ ۔ جزاک اللہ

 

اللہ تعالیٰ آپ کو بھی جزائے خیر عطا کرے آمین