نخوت و پندار کے بت توڑنے والا عمرؓ ۔۔ حافظ محمد عبدالجلیل

نخوت و پندار کے بت توڑنے والا عمرؓ
ہر تنی گردن جھکانے کے لئے آیا عمرؓ

بعد از خیرالوریٰﷺ ہوتا اگر کوئی نبی
کہہ دیا میرے نبیﷺ نے وہ فقط ہوتا عمرؓ

عدل فاروقی ہے سارے دہر میں ضربُ المثل
چار سُو ہے آپ کے انصاف کا چرچا عمرؓ

آپ کے سائے سے بھی شیطان ڈھونڈے ہے فرار
آپ کو مولا نے بخشا دبدبہ ایسا عمرؓ

راہ حق میں ہو شہادت ‘ مرگ در شہرِ بنیﷺ
رب نے ویسا کر دیا جو آپ نے چاہا عمرؓ

کُل نجومِ آسماں کے ہیں برابر نیکیاں
ہو مبارک آپ کو یہ آپ کا حصہّ عمرؓ

اُس طرف کفارِ مکہ سب کھڑے تھے دم بخود
لرزہ بر اندام تھے کہ اب کرے گا کیا عمرؓ

آپ کا ہے منفرد دنیا میں اعزاز و شرف
رب سے خود سرکارﷺ نے ہے آپ کو مانگا عمرؓ
-----
حافظ محمد عبدالجلیل​

 

سبحان اللہ جزاک اللہ