میں نے جب قلم اٹھایا تو تیری یاد آئی

غمِ ہجراں نے جو گھیرا تو تیری یاد آئی
آنکھ سے اشک جو نکلا تو تیری یاد آئی

میرا ہر لفظ تیری مِدح کے سانچے میں ڈھلا
میں نے جب قلم اٹھایا تو تیری یاد آئی

وہ قصیدہ جو تیری یاد میں دل پہ ہے لکھا
جب سرِ بزم سنایا تو تیری یاد آئی

کر کے تسبیحِ اِلہ سجدے میں سر کو رکھ کر
وقتِ قعدہ جو میں بیٹھا تو تیری یاد آئی

تیری مِدحت، تیرا عرفان ہی ہر جا پایا
میں نے قرآن کو کھولا تو تیری یاد آئی

شبِ والیل میں دیکھی تیرے گیسو کی جھلک
والقمر چاند کو سوچا تو تیری یاد آئی

دل کے آئینے سے ہر نقشِ خیالی دھو کر
میں نے جو خود کو بھلایا تو تیری یاد آئی

شبِ ہجراں تیرے دیدار کی امیدوں پہ
مثلِ شمع جو میں رویا تو تیری یاد آئی

میں نے دربارِ الہی میں رضا بہرِ دعا
جب کبھی ہاتھ اٹھایا تو تیری یاد آئی

(محمد نعیم رضا)​

 

Re: تیری یاد آئی

بہت ہی خوبصورت نعت شریف ہے
ماشاء اللہ

 

Re: تیری یاد آئی

شکریہ۔ مجھے ذاتی طور پر بھی پسند ہے۔