مُنہ سے جب نامِ شہنشاہِ رسولاں نکلا ۔۔۔ ایاز صدیقی

مُنہ سے جب نامِ شہنشاہِ رسولاں نکلا
خیر مقدم کو دُرودوں کا گلستاں نکلا

بچھ گئی دولتِ کونین مرے رستے میں
میں جو طیبہ کی طرف بے سرو ساماں نکلا

میں تو سمجھا تھا کہ دشوار ہے ہستی کا سفر
اُن کی تعلیم سے یہ کام بھی آساں نکلا

فکرِ مدحت میں جو پہنچا سرِ گلزارِ سخن
ہر گُلِ حرف محمد کا ثنا خواں نکلا

خاک ہو کر ہَدفِ موجِ ہَوا بن جاؤں
درِ آقا کی رسائی کا یہ عنواں نکلا

میرے آئینے میں ہے عشقِ محمد کی جِلا
مجھ سے کترا کے غبارِ غمِ دوراں نکلا

منصبِ ذہن پہ فائز ہوئی جب چشمِ خیال
عشقِ محبوبِ خدا حاصلِ ایماں نکلا

گُلِ توحید کی خوشبو سے مہکتا ہے دماغ
میں بھی منجملۂ خاصانِ گلستاں نکلا

بابِ مدحت میں جو تائیدِ خدا چاہی ایاز
رہنمائی کو ہر اک آیۂ قرآں نکلا
٭٭٭
ثنائے محمدﷺ ... ایاز صدیقی​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ ۔جزاک اللہ

 

اللہ تعالیٰ آپ کو بھی جزائے خیر عطا کرے آمین