قلم سے پھول کھلیں

قلم سے پھول کھلیں ، نطق درفشاں ٹھہرے
<center>وہاں چلا ہوں جہاں گردشِ زماں ٹھہرے</center>
وہ آستاں کہ ارادت میں مہروماہ جھکیں
<center>وہ خاکِ پاک کہ ہر ذرہ کہکشاں ٹھہرے</center>
ہوائے کوچہ محبوب ، شکریہ تیرا
<center>تیرے کرم سے بیاباں بھی گلستاں ٹھہرے</center>
یہ فکر دائرے بنتی رہی خیالوں میں
<center>کوئی تو بات بہ عنوان ارمغاں ٹھہرے</center>
تمام عمر مدینہ میں سونے والے کو
<center>کہاں کہاں سے پکارا کہاں کہاں ٹھہرے</center>
کبھی نظیری و فیضی کی خوشہ چینی کی
<center>کبھی نظامی و خسرو کے ہم زباں ٹھہرے</center>
کبھی عراقی و عطار سے نوا مانگی
<center>کبھی ظہوری و قدسی کے رازداں ٹھہرے</center>
نظر جمی کبھی حسان کے قصیدے پر
<center>کبھی قبیلہ عشاق کا نشاں ٹھہرے</center>
لوائے مہر علی شاہ کو دوش پر رکھ کر
<center>دیار گنج شکر میں بھی مہماں ٹھہرے</center>
جنوں کا درس لیا بو علی قلندر سے
<center>غزل سرائی میں حافظ کے ترجماں ٹھہرے</center>
دیار عشق میں سعدی کی ہمنوائی کی
<center>نہ ماوری کہیں پہنچے نہ درمیاں ٹھہرے</center>
ادب میں مرشد رومی سے اکتساب کیا
<center>وہ اس گروہ میں سرخیل عاشقاں ٹھہرے</center>
غرض اس در مشکل کشا تک آپہنچے
<center>وہ ایک در کہ جہاں دور آسماں ٹھہرے</center>
بہ بارگاہ رسالت یہ ارمغان فقیر
<center>بڑا کرم ہو جو مقبول و کامراں ٹھہرے</center>
سلام ان پہ کہ جن سے ہے نظم کون و مکاں
<center>سلام ان پہ جو شاہ دوجہاں ٹھہرے</center>
سلام ان پہ کہ جن کا نہیں مثیل کوئی
<center>سلام ان پہ کہ جو میر کارواں ٹھہرے</center>
غرض کہ ان پ درود و سلام کی بارش
<center>جو ہر زمیں کے لیے ابردرفشاں ٹھہرے</center>
جنون عشق اسی آستاں پہ لے آیا
<center>جبین شوق جہاں سنگِ آستاں ٹھہرے</center>
جنہیں شعور نہ تھا عقدہ حیات ہے کیا؟
<center>اس اک نگاہ کے صدقہ کے راز داں ٹھہرے</center>
وہ لوگ ، تھا جنہیں بے دست وپائی کا شکوہ
<center>اسی کے در کی غلامی سے تیغ راں ٹھہرے</center>
ازل کے دن کی مشیت کی مصلحت تھی یہی
<center>کہ خاک طیبہ محمد کا آستاں ٹھہرے</center>
اگر چلے ہو تو سوز دوام لے کے چلو
<center>زباں پہ ورد درود و سلام لے کے چلو</center>
نثار دیدہ ودل ، عشق مصطفی کی قسم
<center>کہ یہ جنوں بھی بڑی چیز ہے خدا کی قسم</center>
زمیں کا عجز انہیں کے قدوم کا صدقہ
<center>فلک کے چہرہ پرنور و پرضیا کی قسم</center>
سمندروں میں عمق ان کے فکر و دانش کا
<center>ازل سے لے کر ابد تک کے رہنما کی قسم</center>
جو لب کھلے تو شگوفے بھی کھل کھلا اٹھے
<center>جمال صاحب والیل و والضحی کی قسم</center>
بدل گئے کبھی تیور تو آسماں کانپا
<center>کلام پاک کی آیات دل کشا کی قسم</center>
کھلی ہیں ان پہ غیاب وحضور کی راہیں
<center>نظام عالم انساں کے ارتقا کی قسم</center>
“ بہ آں گروہ کے از عشق مصطفی مستند
<center>سلام ما برسانید ہر کجا ہستند“</center>

 

جزاک اللہ

 

جزاک اللہ

جزاک اللہ سبحان اللہ
بہت طویل و بہت خوب

 

نہایت شاندار