قطعات

اب مجھے آزاد کر دو چھوڑ دو
جان و دل کے سارے رشتے توڑ دو
جب کوئی منزل نہیں میری تو پھر
رُخ کسی جانب بھی میرا موڑ دو

 

وہ یوں کھو کے مجھے پایا کریں گے
میرا افسانہ دہرایا کریں گے
ستم اپنے جو یاد آیا کریں گے
تو دل ہی دل میں پچھتایا کریں گے

 

یہ تو بڑھتی ہی چلی جاتی ہے میعاد ستم
جز حریفان ستم کس کو پکارا جائے
وقت نے ایک ہی نکتہ تو کیا ہے تعلیم
حاکم وقت کو مسند سے اتارا جائے

 

وہ کھل کر مجھ سے ملتا بھی نہیں ہے
مگر نفرت کا جذبہ بھی نہیں ہے
یہاں کیوں بجلیاں منڈلا رہی ہیں
یہاں تو ایک تنکا بھی نہیں ہے

 

لہو روتے نہ اگر ہم دمِ رخصت یاراں
کیا عجب تھا کہ کوئی اور تماشہ کرتے
چلو اچھا ہے کہ وہ بھی نہیں نزدیک اپنے
وہ جو ہوتا تو اُسے بھی نہ گوارا کرتے

 

تیرا حسن بھی بہانہ میرا عشق بھی بہانہ
یہ لطیف استعارے نہ سمجھ سکا زمانہ
میں نثار دست نازک جو اٹھائے ناز شانہ
کہ سنور گئیں یہ زلفیں تو سنور گیا زمانہ

 

آپ کی تلخ نوائی کی ضرورت ہی نہیں
میں تو ہر وقت ہی مایوسِ کرم رہتا ہوں
آپ سے مجھ کو ہے اک نسبتِ احساسِ لطیف
لوگ کہتے ہیں ، مگر میں تو نہیں کہتا ہوں

 

چاند کی بے بسی کو سمجھوں گی
روشنی کی کمی کو سمجھوں گی
ایک پتھر سے دوستی کر کے
آپ کی بے رخی کو سمجھوں گی

 

کون سود و زیاں کی دنیا میں
دردِ غربت کا ساتھ دیتا ہے
جب مقابل ہوں عشق اور دولت
حسن دولت کا ساتھ دیتا ہے

 

آج تک قائم ہے ، اس کے لوٹ آنے کی امید
آج تک ٹھہری ہوئی ہے زندگی اپنی جگہ
لاکھ یہ چاہا کہ اس کو بھول جاؤں پر قتیل
حوصلے اپنی جگہ ہیں ، بےبسی اپنی جگہ

 

شرم ، دہشت ، جھجک ، پریشانی
ناز سے کام کیوں نہیں لیتیں
آپ،وہ،جی،مگر ’’یہ سب کیا ہے‘‘
تم مرا نام کیوں نہیں لیتیں

 

ہاہاہاہا واہ

 

ذرا محتاط ہونا چاہیے تھا
بغیر اشکوں کے رونا چاہیے تھا
اب ان کو یاد کر کے رو رہے ہیں
بچھڑتے وقت رونا چاہیے تھا

 

یوں تو اپنے قاصدانِ دل کے پاس
جانے کس کس کے لیے پیغام ہیں
جو لکھے جاتے رہے اوروں کے نام
میرے وہ خط بھی تمہارے نام ہیں

 

حسین نغمہ سراؤ ! بہار کے دن ہیں
لبوں کی جوت جلاؤ ! بہار کے دن ہیں
تکلفات کا موسم گزر گیا صاحب !
نقاب رخ سے اٹھاؤ بہار کے دن ہیں

 

تم نے دیکھا ہے سورج کا زمیں سے ملنا
اس سے ملنے کے لیے خودکو ڈبو دیتا ہے
اسکو کیا معلوم کہ اسکی جدائ میں فلک
ساری دنیا کو اندھیرے میں سمو دیتا ہے

 

اشکوں میں قلم ڈبو رہا ہے
فن کار جوان ہو رہا ہے
مقتل کے دکھا رہا ہے منظر
کاغذ کو لہو سے دھو رہا ہے

 

گر ہمیں تیرا سہارا ہے ، خدا جانتا ہے
پھر تو ہر ظلم گوارہ ہے ، خدا جانتا ہے
میری ہر راہ گزرتی ہے تیرے کوچے سے
تو میرا قطبی ستارہ ہے ، خدا جانتا ہے

 

بس ایک بات کی اس کو خبر ضروری ہے
کہ وہ ہمارے لیے کس قدر ضروری ہے
دلوں میں درد کی دولت بچا بچا کے رکھو
یہ وہ متاع ہے جو عمر بھر ضروری ہے

 

چڑھ گیا سانس جھک گئیں نظریں
رنگ رخسار میں سمٹ آیا
ذکر سن کر مری محبت کا
اتنے بیٹھے تھے ، کون شرمایا ؟

 

فیصلہ ہونا ہے جو کچھ آج ہونا چاہئے
مدتیں لگ جائیں گی محشر بپا ہوتے ہوئے

سوچتا رہتا ہوں کب بدلے گی گلشن کی ہوا
دیکھتا رہتا ہوں لمحوں کو ہوا ہوتے ہوئے

 

زمیں پہ رہ کے دماغ آسماں سے ملتا ہے
کبھی یہ سر جو ترے آستاں سے ملتا ہے
اسی زمیں سے اسی آسماں سے ملتا ہے
یہ کون دیتا ہے آخر کہاں سے ملتا ہے

 

باہم جو حسن و عشق میں یارانہ ہو گیا
کوئی پری بنا کوئی دیوانہ ہو گیا
اتنی سی بات پر کہ ہوئی شمع بے حجاب
تیار جان دینے کو پروانہ ہو گیا

 

ایک سمندر جو میرے قابو میں ہے
اور ایک قطرہ ہے جو سنبهلتا نہیں
ایک زندگی ہے جو تیرے بغیر بیتانی ہے
اور ایک لمحہ ہے جو گزرتا نہیں

 

جون ایلیا. اب مجھے آزاد کر دو چھوڑ دو
جان و دل کے سارے رشتے توڑ دو
جب کوئی منزل نہیں میری تو پھر
رُخ کسی جانب بھی میرا موڑ دو

 

رگوں سے روح میں تحلیل ابھی باقی ہے
کلی سے پھول کی تشکیل ابھی باقی ہے
کلی کا رس کوئی بھنورا نہ لے اُڑے فرحت
کہ اسکی ذات کی تکمیل ابھی باقی ہے
فرحت خان

 

نا فہمی اپنی پردہ ہے دیدار کے لیے
ورنہ کوئی نقاب نہیں یار کے لیے
نور تجلی ہے تیرے رخسار کے لیے
آنکھیں میری کلیم ہیں دیدار کے لیے

 

میں اپنے آپ سے ایک کھیل کرنے والا ہوں
سبھی یہ سوچ رہے ہیں کہ مرنے والا ہوں
کسی کی یاد کا مہتاب ڈوبنے کو ہے
میں پھر سے شب کی تہوں میں اترنے والا ہوں

 

نادم ہوں میں نے کوئی بھی راحت نہ دی تجھے
تو جس کا مستحق تھا ، وہ چاہت نہ دی تجھے
اپنے ہی روز و شب کے جھمیلوں میں گم رہا
جس پر تیرا تھا حق ، وہ رفاقت نہ دی تجھے

 

تم جب آؤ گی کھویا ہوا پاؤ گی مجھے
میری تنہائی میں خوابوں کے سوا کچھ بھی نہیں
میرے کمرے کو سجانے کی تمنا ہے تمہیں
میرے کمرے میں کتابوں کے سوا کچھ بھی نہیں