عاشقوں پاؤں نہ اکھڑے وہیں ٹھرے رہنا

عاشقوں پاؤں نہ اکھڑے وہیں ٹھرے رہنا
پردہ اٹھتا ہے رخ یار سے سنبھلے رہنا

عرش پر سے بھی تمہیں کھینچ کے لے آئیں گی
کشش عاشق بیتاب سے بچتے رہنا

تڑپ اٹھا دل بے تاب کسی عاشق کا
یہ مرا فرض ہے کہہ دیتا ہوں بچتے رہنا

ڈوب کر بحرِ محبت میں نکلنا کیسا
پار ہونے کی تمنا ہے تو ڈوبے رہنا

معرکے سے نہیں ہٹتا کوئی عاشق پیچھے
سر ہتھیلی پہ دھرے آگے ہی بڑھتے رہنا

نظر آجائے جو وہ توبہ شکن اے اکبرؔ
دل کو ہاتھوں سے دبائے ہوئے بیٹھے رہنا
شاہ اکبر دانا پوری​