رکھیں نہ کیوں امید کرم کی خدا سے ہم ۔۔۔ رہبر جونپوری

رکھیں نہ کیوں امید کرم کی خدا سے ہم
وابستہ ہیں حریم در مصطفیٰﷺ سے ہم

اے کاش جا کے روضۂ اقدس کو چوم لیں
رہتے ہیں بے قرار اسی مدعا سے ہم

قائم ہیں اس زمانۂ باطل شعار میں
قرآن سے ، خدا سے ، شہِ انبیا سے ہم

امت ترے حبیب کی ہیں ہم کو بخش دے
محشر کے دن یہ عرض کریں گے خدا سے ہم

دیکھیں گے جگمگاتا ہوا چہرۂ حیات
کام آئینہ کا لیں گے ترے نقش پا سے ہم

جس خاک پا سے عرش بریں کو شرف ملا
رہبرؔ میں سر بلند اسی خاک پا سے ہم
٭٭٭
رہبر جونپوری (بھوپال)​

 

سبحان اللہ ۔ جزاک اللہ

 

اللہ تعالیٰ آپ کو بھی جزائے خیر عطا کرے آمین

 

اللہ تعالیٰ آپ کو بھی جزائے خیر عطا کرے آمین