خود ستائی

حضرت سیدنا عیسیٰ روح اللہ علیہ السلام نے اپنے حواریوں سے گفتگو کرتے ہوئے ارشادفرمایا :بہت سے چراغ ایسے ہیں جن کو ہوانے بجھا دیا ہے اوربہت سے عابد ایسے ہیں جن کو عُجب(خود پر اترنا)نے تباہ کردیا ہے ،انسان کی زندگی اللہ رب العزت کی بندگی کیلئے ہے اوریہ خصلت بدانسان کو اس مقصدِ جلیل سے محروم کردیتی ہے ، اگر وہ تھوڑی بہت نیکی حاصل بھی کرے تو یہ عجب اس کی کوبھی تباہ کردیتا ہے اوروہ بالکل تہی دست ہوکر رہ جاتا ہے۔خلیفہ ء رسول حضرت ابوبکر صدیق رضی اللہ عنہ ارشادفرماتے ہیں کہ ہمیشہ خود پسندی سے بچو اورراہِ حق پر چلو، خودپسندی بندوں کے کمال اورصلاحیتوں کو برباد کردیتی ہے۔امیر المومنین حضرت عمرابن خطاب رضی اللہ عنہ کا ارشادہے کہ تیری توبہ کا حسن یہ ہے کہ تو اپنے گناہ کوخوب پہچانے اورتیرے عمل کا حسنِ کمال یہ ہے کہ خودپسندی کو ترک کردے، اورتیرے شکر کا حسن یہ ہے کہ اپنی کوتاہی کو ہمیشہ اپنے سامنے رکھے۔حضرت عثمان رضی اللہ عنہ فرماتے ہیں کہ دنیا کا ایک روپ عجب یعنی خود پسندی ہے اورجس نے اس سے اجتنا ب کیا اس نے اللہ کو پالیا جو خود پسندی کے فریب میں مبتلاء ہواوہ اللہ رب العزت کی بارگاہ سے دور ہوگیا۔حضرت علی کرم اللہ وجہہ الکریم نے فرمایاکہ جو غلطی تمہیں بارگاہِ الہٰی میں شرمسار کرے وہ اس عمل سے بہتر ہے جو تمہیں خود پسند بنا دے، خود پسندی سب سے بڑی وحشت ہے جو انسان کو بے شمارپریشانیوں میں مبتلاء کردیتی ہے اور اسکی ترقی کے راستے میں حائل ہوجاتی ہے ۔حضرت مطرف بن عبداللہ رحمۃ اللہ علیہ فرماتے ہیں کہ رات بھر سوکر ندامت کی حالت میں بیدار ہونا ،مجھے اس سے زیادہ پسند ہے کہ میں شب بیدار ہوں اورصبح کو عجب (وغرور ) محسوس کروں ۔حضرت وہب بن منبہ علیہ الرحمۃ کہتے ہیں کہ بنی اسرائیل میں ایک ایسا شخص تھا جو سترسال تک عبادت وریاضت میں مصروف رہا، اس نے ایک بار اللہ رب العزت کے حضور میں اپنی کسی احتیاج کیلئے دعا کی جو قبول نہ ہوئی ،وہ اپنے آپ کو ملامت کرنے لگا ، کہ اگر تجھ میں کچھ بھلائی ہوتی تو تیری حاجت ضرور پوری ہوتی ،یہ سب تیرے نفس کی نحوست ہے ، اسی وقت اسے بشارت دی گئی کہ اے انسان تیری وہ گھڑی جس میں تو نے اپنے نفس کو حقیر و ذلیل سمجھا تیری ستر سال کی عبادت سے بہتر ہے۔ حضرت شبعی رحمۃ اللہ علیہ بیان کرتے ہیں کہ گزشتہ ایک اُمت میں ایک ایسا صاحب کرامت انسان بھی تھا کہ دھوپ کے عالم میں ایک بادل کا ٹکرا اس پر سایہ کیے رہتا تھا ،ایک دفعہ یوں ہوا کہ ایک دوسرا شخص بھی اس کا سایہ دیکھ کر اسکے ساتھ چل دیا، وہ عابد اس خیال سے سرشار ہوکر پھولانہ سمایا کہ اس جیسے لوگ بھی میری نیکی کا اعتراف کرتے ہیں اور میرے ساتھ چلتے ہیں ،جب وہ چلتے چلتے الگ ہونے لگے تو سایہ دوسرے شخص کے ساتھ ہولیا۔(احیاء العلوم )
میں نے دیوار اٹھائی تھی کہ خود کو دیکھوں
اب یہاں کوئی نہیں دیکھنے والا مجھ کو

http://www.nawaiwaqt.com.pk/noor-e-baserat/11-Feb-2015/360161