حیات تجھ سے زمانہ تیرے خرام سے ہے ۔۔۔ ضیا ترک

منقبتِ عالی مقام امام حسین رضی اللہ تعالیٰ عنہ
--------
حیات تجھ سے زمانہ تیرے خرام سے ہے
یہ کائنات تیرے اسم کے دوام سے ہے

تیرا وجود ہی روشن ہے دوش و فردا میں
بقائے دہر یقیناً تیرے قیام سے ہے

عجیب ربط تیری ذات سے ثبات کو ہے
کہ دشتِ کرب و بَلا بھی تیرے خیام سے ہے

ہم ایسے خاک نسب لوگ سَر بُلند ہُوئے
کہ ہم پہ اُتری ہوئی شام تیرے نام سے ہے

حسین ۔ تیرا حوالہ مِلے تو پُوری ہو
یہ زندگی کہ جو تقسیمِ صبح و شام سے ہے

میرا لِکھا ہُوا ہر لفظ معتبر ہو گا
میرا لِکھا ہُوا ہر لفظ تیرے نام سے ہے

ہے پیش فردِ عمَل اور مُطمئن ہُوں ۔ تُرک
ہزار شُکر ۔ کہ نسبت میری اِمام سے ہے
--------
شاعر : ضیا ترک​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ ۔ جزاک اللہ

 

اللہ تعالیٰ آپ کو بھی جزائے خیر عطا کرے آمین