حکایت سعدیؒ، بوڑھے کی نصیحت

حکایت سعدیؒ، بوڑھے کی نصیحت

حضرت سعدیؒ بیان کرتے ہیں کہ ایامِ جوانی میں ایک شب ہم کچھ دوست گپ شپ میں مصروف تھے۔ ہر شخص بلبل کی طرح چہک اور پھول کی طرح مہک رہا تھا۔ اس محفل میں اتفاق سے ایک بوڑھا بھی شریک تھا لیکن وہ بالکل خاموش تھا۔ ایک نوجوان نے کہا، بڑے میاں! آپ کس سوچ میں پڑے ہیں؟ ہماری گفتگو میں شامل ہو کر دل کا بوجھ ہلکا کیجیے۔ ہنسیے بولیے۔ بوڑھے نے یہ بات سنی تو آہِ سرد بھر کر بولا، برخوردار! صبا کے جھونکوں سے سرشار ہو کر جھومنا جوان درختوں ہی کو زیبا ہے۔ درخت اس وقت تک جھوم سکتا ہے جب تک اس کی شاخیں پتوں سے لدی ہوئی ہوں۔ بوڑھا درخت جنبش کرے تو ٹوٹ جاتا ہے۔ شبِ جوانی کی سحر ہو جائے تو ہوس کو سر سے نکال دینا ہی بہتر ہے۔ جوانی دیوانی میں کھانے اور پہننے کی فکر نے مجھے دین سے غافل رکھا۔ افسوس! یہ قیمتی زمانہ کیسی فضول خواہشوں میں گزر گیا۔ ہماری حالت تو بالکل اس استاد کی سی ہوئی جس نے بصد افسوس اپنے شاگرد سے کہا تھا کہ وائے حسرتا! وقت ختم ہو گیا اور کام ابھی باقی ہے طیور فصلِ بہاراں میں چہچہاتے تھے خزاں میں ان کا ہر اک نغمہ بن گیا فریاد شریکِ محفلِ طفلاں ہو مردِ پیر اگر تو یوں ہے جیسے خزاں میں بہار کی روداد حضرت سعدیؒ نے اس حکایت میں انسان کے انجام کی طرف اشارہ کرتے ہوئے یہ نصیحت کی ہے کہ کم از کم بڑھاپے کی عمر میں لہو و لعب سے ضرور اجتناب کرنا چاہیے۔ زندگی کا انجام بہرحال موت ہے اور یہ بھی سچ ہے کہ اس فانی زندگی کے بعد غیر فانی زندگی شروع ہو گی۔ عاقل وہ ہے جو غیر فانی زندگی کے لیے اچھے اعمال فراہم کرتا ہے۔ اچھے اعمال کے لیے دورِ جوانی کو خاص اہمیت حاصل ہے۔ اس دور میں جسم توانا ہوتا ہے، حقوق اللہ اور حقوق العباد کی ادائیگی بہتر طور پر کرنے کے قابل ہوتا ہے لہٰذا اس دور کو بہتر طور پر گزارنا چاہیے۔ علاوہ ازیں بڑھاپے میں اپنی استطاعت کے مطابق افعال و اعمال سرانجام دینے کی کوشش کرنی چاہیے۔
​

 

شکریہ