حمدیہ کلام۔۔۔ شیخ صدیق ظفرؔ

تُو رؤف ہے تُو رحیم ہے، تُو عظیم ہے تُو عظیم ہے
تُو حلیم ہے تُو کریم ہے، تُو عظیم ہے تُو عظیم ہے

تُو خیال میں نہ سما سکے، تُو نظر کسی کو نہ آ سکے
دِلِ عاشقاں میں مقیم ہے، تُو عظیم ہے تُو عظیم ہے

ہیں سبھی ملائک و انس و جاں، ترے حمد گو، ترے مدح خواں
یہی وردِ بادِ نسیم ہے، تُو عظیم ہے تُو عظیم ہے

تُو اُسی کے شر سے ہمیں بچا، جو دلوں میں ڈالے ہے وسوسہ
جو غنیم ہے جو رجیم ہے، تُو عظیم ہے تُو عظیم ہے

ہمیں ساحروں سے بھی تُو بچا، ہمیں حاسدوں سے بھی تُو بچا
تُو ہے چارہ گر تُو حکیم ہے، تُو عظیم ہے تُو عظیم ہے

کبھی ہم نشین حبیب تُو، سرِ عرش اُنؐ کے قریب تُو
کبھی ہم کلامِ کلیم ہے، تُو عظیم ہے تُو عظیم ہے

چھڑا تذکرہ تری حمد کا تو ظفرؔ بس اتنا ہی کَہ سکا
تُو عظیم ہے، تُو عظیم ہے، تُو عظیم ہے، تُو عظیم ہے
٭٭٭
خزینۂ حمد و نعت ۔۔۔ شیخ صدیق ظفرؔ
​

 

زمین و آسماں اُس کے، مکان و لامکاں اُس کے
سمندر، کوہ و بن اُس کے، ہیں دریائے رواں اُس کے

اُسی کی سب ہوائیں، سب فضائیں، سب خلائیں ہیں
خزائن جتنے ہیں زیرِ زمیں، مخفی، نہاں، اُس کے

نگہباں ہے وہی سب کا، وہی سب کا محافظ ہے
سبھی معصوم بچے بھی، سبھی پیر و جواں اُس کے

وہی ہے خالقِ دنیا، وہی ہے مالکِ عقبیٰ
ملائک بھی سبھی اُس کے، سبھی ہیں اِنس و جاں اُس کے

اُسی کی شاہراہیں سب، ہر اک رستہ ڈگر اُس کی
سوئے طیبہ رواں جتنے ہیں، سب ہیں کارواں اُس کے

اُسی کا ذِکر ہر لمحہ، اُسی کی فکر ہر لحظہ
وظائف ہیں سبھی عُشاق کے وردِ زباں اُس کے

اُنھیؐ کے واسطے سب کچھ بنایا حق تعالیٰ نے
ظفرؔ! محبوبِ یزداں ہیں وہ محبوبِ زماں اُس کے
٭٭٭
خزینۂ حمد و نعت ۔۔۔ شیخ صدیق ظفرؔ​

 

محبت کا جہاں آباد مولا
کروں میں تم سے ہی فریاد مولا

ترے محبوبﷺ کی اُمت پریشاں
تری مخلوق ہے ناشاد مولا

خُدایا! پھر سے شاد آباد کر دے
جو ہیں بے خانماں برباد مولا

مظالم سہتے سہتے عمر گزری
تُو کر دے رنج سے آزاد، مولا

رہے حمدِ خُدا میری زباں پر
رہے دِل میں نبیؐ کی یاد مولا

درِ کعبہ پہ ہوں میں سر بسجدہ
مدینہ کی ہے دل میں یاد مولا

ترے محبوبﷺ کا عاشق ہوں میں بھی
ظفرؔ کو دے تُو اِس کی داد مولا
٭٭٭
خزینۂ حمد و نعت ۔۔۔ شیخ صدیق ظفرؔ​

 

زباں پر حمدِ باری ہے مرے آنسو نہیں تھمتے
خُدا کا خوف طاری ہے، مرے آنسو نہیں تھمتے

خُدا کا ذِکر کرتی ہیں مسلسل اشکبار آنکھیں
عبادت میری جاری ہے، مرے آنسو نہیں تھمتے

خُدا کی یاد میں گریاں جو میں نے دن گزارا ہے
تو شب رو رو گزاری ہے، مرے آنسو نہیں تھمتے

سرایت کر گیا اسمِ خُدا ایسے رگ و پے میں
عجب سی بے قراری ہے، مرے آنسو نہیں تھمتے

عطا کر کے خُدا نے عشقِ محبوبِؐ خُدا مُجھ کو
مری قسمت سنواری ہے، مرے آنسو نہیں تھمتے

خُدا محبوبﷺ کا صدقہ کرم فرمائے اُمت پر
یہی گریہ و زاری ہے، مرے آنسو نہیں تھمتے

خُدا کا ذِکر، یادِ مصطفیٰﷺ، باہم ظفرؔ میں نے
دِل و جاں میں اُتاری ہے، مرے آنسو نہیں تھمتے
٭٭٭
خزینۂ حمد و نعت ۔۔۔ شیخ صدیق ظفرؔ​

 

سرورِ قلب و جاں، اللہ ہی اللہ
کہاں تُو، میں کہاں، اللہ ہی اللہ

نہاں یادِ خُدا ہے دِل میں میرے
عیاں وردِ زباں، اللہ ہی اللہ

طیور و جن و انسان و ملائک
سبھی رطبُ اللساں، اللہ ہی اللہ

تمامی اولیاء بھی، انبیاء بھی
کریں ہر دم بیاں، اللہ ہی اللہ

ہوئے تخلیق پل میں سارے عالم
صدائے کُن فکاں، اللہ ہی اللہ

وہی محبوبِؐ ربّ العالمیں ہیں
وہ رحمت کے جہاں، اللہ ہی اللہ

ظفرؔ! عُشاق کی جنت زمیں پر
نبیﷺ کا آستاں، اللہ ہی اللہ
٭٭٭
خزینۂ حمد و نعت ۔۔۔ شیخ صدیق ظفرؔ
​

 

زماں سب حمد میں مصروف ہر دم
خُدا کی ذات قائم اور دائم

خُدا خالق، خُدا مالک ہمارا
خُدا حاکم ہے اور محکوم ہیں ہم

خُدا حاجت روا ہے، چارہ گر ہے
تو پھر کس بات کا اندیشہ و غم

خُدا کی نعمتیں بے انتہا ہیں
خُدا کا شکر ہم کرتے ہیں کم کم

رہے ذِکرِ خُدا ہر دم زباں پر
سماں کیسا بھی ہو، کیسا ہو موسم

خُدا کی حمد گونجے ہر جہاں میں
کبھی نہ گونج اِس کی ہو گی مدھم

بوقتِ حمدِ یزداں، نعتِ احمدﷺ
ظفرؔ کا جسم لرزاں، چشم پُر نم
٭٭٭
خزینۂ حمد و نعت ۔۔۔ شیخ صدیق ظفرؔ
​

 

خُدا جب عظمت و قدرت دکھائے
سمندر، ایک قطرے کو بنائے

خُدا کی یاد جو دِل میں بسا لیں
خُدا اُن کی جبیں پر نور لائے

خُدا رکھے ہمیں اپنی اماں میں
نہ مرض و امتحاں سے آزمائے

خُدا محفوظ رکھے حاسدوں سے
عُدو، اشرار کے شر سے بچائے

نظر کن سوئے ما حرماں نصیباں
رحیم و قادرِ مطلق خُدائے

مریضِ نیم بسمل نیم جاں را
رساں مژدۂ روح و جانفزائے

ظفرؔ مسکین و عاجز بے نواست
کرم بر حالِ اُو ادنیٰ گدائے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُداوندِ مکان و لا مکاں ہے
خُداوندِ زمین و آسماں ہے

خُداوندِ جہاں، رازِ نہاں ہے
حبیبِ کبریاؐ، بس راز داں ہے

یہاں ہر چیز فانی، آنی جانی
خُدا کی ذات قائم، جاوداں ہے

فضا و بحر و بر، ابر رواں میں
خُدا کا ذِکر جاری ہے، عیاں ہے

خُدا کے ذِکر سے سانسیں رواں ہیں
خُدا کی یاد سے ہی جاں میں جاں ہے

خُدا کی عظمتوں کا مُعترف میں
مرا سوزِ درُوں، قلبِ تپاں ہے

ظفرؔ یاں سر خمیدہ، دم کشیدہ
یہ بیت اللہ، عظمت کا جہاں ہے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُدا ارفع و اعلیٰ محترم ہے
اُسے زیبا ہر اک جاہ و حشم ہے

اُسی کے ذِکر سے دِل مطمئن ہیں
اُسی کی فکر میں ہر چشم نم ہے

خُدا کا نام پل پل، لمحہ لمحہ
یہی میرا وظیفہ دم بدم ہے

خدا کے سامنے گریہ کناں ہوں
ہر عاشق زار میرا ہم قدم ہے

فنا فی اللہ جو ہیں اُن کو بھلا کیا
ملالِ بیش و کم، شادی و غم ہے

ثنا گو ہوں خُدا کا، مصطفیٰﷺ کا
یہ کیا میرے لیے اعزاز کم ہے

ظفرؔ سے عاصیوں کا، بے کسوں کا
خُدائے مصطفیٰﷺ رکھتا بھرم ہے
٭٭٭
خزینۂ حمد و نعت ۔۔۔ شیخ صدیق ظفرؔ
​

 

مرا ستّار ہے، میرا خُدا ہے
مرا غفّار ہے، میرا خُدا ہے

مرے دِل میں بسا رہتا ہے ہر دم
مرا دِلدار ہے، میرا خُدا ہے

مرا ہر زخم بھر دیتا ہے پل میں
مرا غم خوار ہے، میرا خُدا ہے

وہی روزی رساں ہے عالمیں کا
وہ پالن ہار ہے، میرا خُدا ہے

وہاں وہ دستگیرِ رہرواں ہے
جو رہ دشوار ہے، میرا خُدا ہے

جسے چاہے وہ عزت سے نوازے
وہ خود مختار ہے، میرا خُدا ہے

ہے عفو و درگزر جس کا وتیرہ
ظفرؔ سرشار ہے، میرا خُدا ہے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُدا کی عظمتیں ہر پل عیاں ہیں
خُدا کی طاقتیں ہر پل عیاں ہیں

ہر اک اہلِ نظر، ہر دیدہ ور پہ
خُدا کی قدرتیں ہر پل عیاں ہیں

خُدا ہی خالقِ کون و مکاں ہے
خُدا کی رفعتیں ہر پل عیاں ہیں

خُدا روزی رساں سب عالمیں کا
خُدا کی نعمتیں ہر پل عیاں ہیں

خُدا دیتا ہے عزت، جاہ و حشمت
عطائیں، بخششیں ہر پل عیاں ہیں

خُدا کی اور محبوبِؐ خُدا کی
عطائیں، شفقتیں ہر پل عیاں ہیں

خُدا کی حمد ہر دم، نعت ہر پل
ظفرؔ کی چاہتیں ہر پل عیاں ہیں
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُدا مُجھ پر بھی وقتِ سعد لائے
مری نس نس میں اللّٰہٗ سمائے

خُدا کے فضل سے ہو قلب جاری
زباں پر بھی خُدا کا نام آئے

خُدا بیدار کر دے بخت میرے
مرا سویا نصیبہ بھی جگائے

ہے ویراں جس کسی کا خانۂ دِل
خُدا کی یاد سے دِل کو سجائے

خُدا کا ذِکر ہو جس گھر میں پیہم
سدا ابرِ کرم اُس گھر پہ چھائے

مری فریاد پہنچائے خُدارا
خُدا کے گھر جو عاشق زار جائے

ظفرؔ! الطافِ محبوبِؐ خُدا کے
رہیں قائم سدا اُمت پہ سائے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُداوندِ کون و مکاں، اللہ اللہ
خُدائے نہاں و عیاں، اللہ اللہ

کیے جس نے تخلیق سارے زمانے
وہ صوت و صدا کُن فکاں، اللہ اللہ

خُدا کی خُدائی کے عکاس و مظہر
زمیں، آسماں، کہکشاں، اللہ اللہ

یہ دشت و جبل، بحر و بر، چاند تارے
پکاریں سبھی اِنس و جاں، اللہ اللہ

ہر اک طائرِ خوشنوا، غنچہ و گُل
پڑھے ہر چمن، گُلستاں، اللہ اللہ

ہے اسمِ خُدا قلب و جاں میں سمایا
مسلسل ہے وردِ زباں، اللہ اللہ

ظفرؔ! آستانِ حبیبِ خُداؐ ہے
محبت نشاں، ضو فشاں، اللہ اللہ
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُدائے مہرباں کی ذاتِ باری
نگہبان و محافظ ہے ہماری

خُدا کے فضل کا، لُطف و کرم کا
سخا کا سلسلہ ہر آن جاری

وہ مخلوقات کا روزی رساں ہے
اُسی خالق کی ہے مخلوق ساری

وہی بادِ صبا، ابرِ کرم سے
کرے بنجر زمیں کی آبیاری

وہ کانٹوں میں اُگائے پھُول کلیاں
کرے کچھ اس طرح پیوند کاری

شہیدوں پر خُدا کی رحمتیں ہوں
جنھوں نے دین پر جاں اپنی واری

ظفرؔ مانگے خُدا سے عشقِ احمدﷺ
یہی ہے روز و شب، گِریہ و زاری
٭٭٭
خزینۂ حمد و نعت ۔۔۔ شیخ صدیق ظفرؔ​

 

جلالِ کبریا پیشِ نظر ہے
جمالِ مصطفیٰﷺ پیشِ نظر ہے

خُدا کا ہے بڑا احسان مُجھ پر
محمدﷺ، باخُدا، پیشِ نظر ہے

خُدا کی عظمتوں کا، رفعتوں کا
عظیم اک سلسلہ پیشِ نظر ہے

خُدا کے لُطف کا، جُود و سخا کا
کرم کا مرحلہ پیشِ نظر ہے

خُدا کے گھر کی جانب جو رواں ہے
وہ سِیدھا راستا پیشِ نظر ہے

وہ جائیں گے جو بُلوائے گئے ہیں
خُدا کا فیصلہ پیشِ نظر ہے

ظفرؔ پر ہر نوازش ہے خُدا کی
نبیﷺ کی ہر عطا پیشِ نظر ہے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُدائے پاک ربّ العالمیں ہے
محمدﷺ رحمۃ اللعالمیں ہے

خُدا بندے کی شہ رگ سے قریں تر
حبیبِ کبریاﷺ دِل کے قریں ہے

مسلسل بندگی ربّ العلیٰ کی
نبیﷺ کی یاد ہر دم دِلنشیں ہے

مگن حمدِ خُدا، نعتِ نبیﷺ میں
مکان و لامکاں ہے، ہر مکیں ہے

خُدا ستّار بھی، غفّار بھی ہے
رسول اللہﷺ، شفیع المذنبیں ہے

جو عاشق ہیں خُدا و مصطفیٰﷺ کے
مُنوّر اُن کا دِل، روشن جبیں ہے

خُدا سا، اور محبوبِ خُدا سا
ظفرؔ! کوئی نہیں، کوئی نہیں ہے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُدا کو جب بھی طُوفاں میں پُکارا
بھنور نے سطحِ دریا پر اُبھارا

لبِ ساحل خُدا لے آیا مُجھ کو
کیا منجدھار میں پیدا کنارا

بچاتا ہے خُدا ہی ڈوبنے سے
وہی دیتا ہے تنکے کا سہارا

خُدا کا ذِکر، ذِکرِ دِلکشا ہے
خُدا کا ذِکر، دِلکش ہے دِلآرا

بسایا میں نے تن من میں خُدا کو
خُدا کا نام ہی دِل میں اُتارا

خُدا کی یاد ہی میں شب گزاری
خُدا کی یاد میں دِن بھی گزارا

خُدا کی بارگہ میں عرض کر کے
ظفرؔ نے کام ہر بِگڑا سنوارا
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُدا کا ذِکر دِل میں، آنکھ نم ہے
خُدا کا لُطف پیہم ہے، کرم ہے

خُدا کی یاد سے دِل کھِل اُٹھا ہے
خوشی ہر سُو ہے، اب کوئی نہ غم ہے

وہی ہم دم ہے، دم سازِ غریباں
کرم فرما ہمیشہ، دم بدم ہے

وہ سیدھی رہ دکھائے گُمرہوں کو
گنہ گاروں کا بھی رکھتا بھرم ہے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خُدا کا خانہ کعبہ دِل کُشا ہے
حبیب اللہﷺ کا دِل کش حرم ہے

جھُکا ہے سر نبیﷺ کے آستاں پر
ہیں لکھتے نعت آنسو، سر قلم ہے

تُو دربانِ حبیبِ کبریا ہے
ظفرؔ! تیرا یہ کیا اعزاز کم ہے

خُدا کی ذات وہ سِرِّ نہاں ہے
جو موجُودات میں واضح عیاں ہے

وہی ہے خالقِ کون و مکاں جو
مسیحائے ہمہ مُردہ دِلاں ہے

وہی ہے مالکِ کُل، خالقِ کُل
وہ مخلوقات کا روزی رساں ہے

گزرگاہِ خُدا ہے چشمِ گِریاں
یا پھر عُشاق کا قلبِ تپاں ہے

نبی اللہؐ، کلام اللہ سُنائے
حبیب اللہؐ، خُدا کا ترجماں ہے

یہی خُلدِ بریں، باغِ جناں ہے
ترے محبوبﷺ کا جو آستاں ہے

ظفرؔ کی لاج رکھ لینا خُدایا!
مسافر جانبِ طیبہ رواں ہے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خدا کا خوف جس دل میں سمائے
وہ عاشق زار خود روئے، رُلائے

جمالِ کبریا جو دیکھ پائے
وہ رکھے راز، سینے میں چھپائے

کرے حمد و ثنا عاشق وہ ہر پل
خدا کی عظمتوں کے گیت گائے

ولی ہے، جو ہے مجذوب و قلندر
سلام اس کو کریں اپنے پرائے

جو ناداں شخص اسے مجنون سمجھے
تو دانا راہ میں آنکھیں بچھائے

ستائے نہ کوئی ان عاشقوں کو
کبھی کوئی نہ ان کا دل دُکھائے

خدا حافظ ظفرؔ عشاق کا ہے
نبیﷺ کی رحمتوں کے اِن پہ سائے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خدا ہے حامی و ناصِر ہمارا
خدا ہے بے سہاروں کا سہارا

خدا ابرِ کرم فیض و عطا کا
محبت کا، خدا ہے استعارہ

بچاتا ہے خدا ہی ڈُوبنے سے
بھلا دیتا ہے تنکا بھی سہارا

خدا کے حکم سے طوفان میں بھی
مجھے ساحل پہ موجوں نے اُتارا

مرا چہرہ بہت ہی بدنما تھا
خدا نے دستِ قدرت سے سنوارا

چہ گویم حالِ ما بر تو عیانست
نگاہے سوئے من گاہے خدا را

ظفرؔ مسکین و عاجز بندۂ تو
نواز ایں کہتر و کمتر گدا را
٭٭٭
خزینۂ حمد و نعت ۔۔۔ شیخ صدیق ظفرؔ​

 

خدا کا گھر درخشاں، ضو فشاں ہے
اُسی جانب رواں ہر کارواں ہے

یہی گھر مرکزِ اجماعِ اُمت
مسلمانوں کی وحدت کا نشاں ہے

یہی گھر منزلِ انسانیت ہے
یہی امن و سکوں کا ترجماں ہے

مقام اس کا فزوں تر سدرہ سے بھی
اگرچہ گھر یہ زیرِ آسماں ہے

طواف اس کا کریں جن و ملائک
یہی معمولِ انساں جاوداں ہے

سبھی کا پیرہن ہے اُجلا اُجلا
سفید احرام کا سیلِ رواں ہے

ظفرؔ کعبے کا کعبہ جانتے ہو
حبیبِ کبریاؐ کا آستاں ہے
٭٭٭
خزینۂ حمد و نعت ۔۔۔ شیخ صدیق ظفرؔ​

 

خدا کا ذکر، ذکرِ دلکشا ہے
خدا کا ذکر ذکرِ جانفزا ہے

خدا کا ذکر جب نازل ہو دل پر
لرزتا ہے بدن، دل کانپتا ہے

خدا ہے کارسازِ درد منداں
مریضوں کو خدا دیتا شفا ہے

خدا کے نام کا چرچا جہاں میں
خدا کا نام ہر سو گونجتا ہے

خدا ہے جاوداں تا ابد الآباد
خدا قیوم و دائم ہے سدا ہے

خدا رستہ دکھائے منزلوں کا
خدا رہبر ہے، سب کا رہنما ہے

خدا سے مانگ جو کچھ مانگنا ہے
ظفرؔ! داتا سخی سب سے بڑا ہے
٭٭٭
خزینۂ حمد و نعت ۔۔۔ شیخ صدیق ظفرؔ​