حضور پھر سے کریں صاحبِ مُراد مجھے ۔۔ مقصود علی شاہ

حضور پھر سے کریں صاحبِ مُراد مجھے
دیارِ رشکِ اِرم آ رہا ہے یاد مجھے

اُداس رُت کے سفر پر ہے رخشِ عمر رواں
مگر وہ اسم کہ رکھتا ہے پھر بھی شاد مجھے

کرم ہُوا، تری مدحت کی صبحِ نو جاگی
نصیب نے تو بنایا تھا شب نژاد مجھے

نوازنے پہ تو قادر ہیں وہ ورائے طلب
ملے ہیں ہاتھ ہی خواہش کے کم کشاد مجھے

سخی سے ایک ہی مانگا تھا حرف مدحت کا
مگر ہمیشہ دیا اُس نے مُستزاد مجھے

اگرچہ کارِ زیاں ہی رہا ہے پیشِ عمل
مگر ہے اُن کی شفاعت پہ اعتماد مجھے

بُلاوا آ گیا اگلے ہی دن مدینے کا
سمجھ رہے تھے مرے لوگ ہجر زاد مجھے

نوازتے ہیں جو حرفوں کو زندگی کی پھبن
اُنہیں سے ملتی ہے مقصود اِس پہ داد مجھے
-----
مقصود علی شاہ​

 

سبحان اللہ جزاک اللہ