حشر تک شافعِ محشر کا ثنا خواں ہونا ۔۔۔ ایاز صدیقی

حشر تک شافعِ محشر کا ثنا خواں ہونا
بخشوائے گا مجھے میرا سخنداں ہونا

جلوہ گر ہے مرے خوابوں میں مدینے کی فضا
لے اڑا مجھ کو خیالوں کا پرافشاں ہونا

رشتۂ عشقِ نبیﷺ کارِ رفو کرتا ہے
راس آیا مرے دامن کو گریباں ہونا

دامنِ ابرِ کرم نے مرے آنسو پونچھے
تارِ گریہ کو مبارک ہو رگِ جاں ہونا

آپﷺ کے دَم سے دعاؤں کو ملا رنگِ قبول
آپﷺ کے غم نے سکھایا مجھے خنداں ہونا

آپﷺ کے نقشِ کفِ پا کی تجلی سے لیا
ماہ و خورشید و کواکب نے درخشاں ہونا

کاش میں بھی اُنہیں گلیوں میں بکھر جاؤں ایاز
عینِ تسکیں ہے جہاں دل کا پریشاں ہونا
٭٭٭
ثنائے محمدﷺ ... ایاز صدیقی​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ ۔جزاک اللہ

 

اللہ تعالیٰ آپ کو بھی جزائے خیر عطا کرے آمین