اے ربِّ ارتقاے شب و روز و ماہ و سال (ابو مدثر)

اے ربِّ ارتقاے شب و روز و ماہ و سال
محرومیوں کے عہدِ پریشاں کو دے زوال

کیوں کر کوئی ورق پہ سجاے دھنک کے رنگ
زخموں سے چور چور ہے رعنائی خیال

فریاد سن کہ پنجئہ آفات میں ہوں میں
شہ رگ سے بھی قریب ہے تو ربِّ ذوالجلال

بنجر زمین جسم کی، مانگے گھٹا کا لمس
شاداب ساعتوں سے بھرے آرزو کا تھال

آسودگی اگا مری آنکھوں میں بھی کبھی
آلام و رنج و درد کے طوفان سے نکال

خیمہ تنا ہوا ہے ہوائوں کا شہر میں
کیسے کوئی چراغ جلاے شبِ وصال

روئیدگی کا حدِّ نظر تک نہیں نشاں
اترے مری زمین پہ بھی شبنمی سی شال

اے لاشریک و قادر و رحمان و بے نیاز
کیوں تیری ذات ہی سے نہ کرتا رہوں سوال؟​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ- جزاک اللہ

 

اللہ تعالیٰ آپ کو بھی جزائے خیر عطا کرے آمین