اگر سارا زمانہ حاملِ عشقِ خدا ہوتا ۔۔۔ ایاز صدیقی

اگر سارا زمانہ حاملِ عشقِ خدا ہوتا
تو ہر لب پر محمد مصطفےٰ صلِّ علےٰ ہوتا

یہ مہر و مہ نہ یہ ہنگامۂ صبح و مسا ہوتا
نہ آتے آپ تو اک ہو کا عالم جا بجا ہوتا

اگر وہ نام جاں پرور لبِ دل سے ادا ہوتا
تو اے بیمارِ غم تو کب کا اچھا ہو گیا ہوتا

خیالِ صاحبِ لوح و قلم کا فیض ہے ورنہ
نہ آنکھیں با وضو ہوتیں نہ دل محوِ ثنا ہوتا

دلِ سوزاں میں ٹھنڈک پڑ گئی بارانِ رحمت سے
عنایت وہ نہ فرماتے تو اپنا حال کیا ہوتا

غمِ سرکارﷺ نے اک اک قدم پر رہنمائی کی
میں اس ہنگامۂ عیش و طرب میں کھو گیا ہوتا

ہواؤ !جانبِ طیبہ مجھے بھی ساتھ لے جاؤ
خدارا یہ نہ کہہ دینا کہ "پہلے سے کہا ہوتا "

دمِ آخر اگر آقاﷺ نہ دل پر ہاتھ رکھ دیتے
تو پھر صدیوں میں طے یہ اک نفس کا فاصلہ ہوتا

شبیِہ شافعِ محشر سجی تھی شیشۂ دل میں
ایاز ایسے میں کیا اندیشۂ روزِ جزا ہوتا
٭٭٭
ثنائے محمدﷺ ... ایاز صدیقی​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ ۔ جزاک اللہ

 

اللہ تعالیٰ آپ کو بھی جزائے خیر عطا کرے آمین