اڈوبی ریڈر سے ہیکنگ کا خطرہ

اڈوبی ریڈر سے ہیکنگ کا خطرہ
’اڈوبی کے اس نقص کا جس سطح پر استحصال ممکن ہے، وہ باعث حیرت ہے‘
ویب استعمال کرنے والوں پر زور دیا جارہا ہے کہ وہ اپنے اڈوبی ریڈر سافٹ ویئر کو اپ ڈیٹ کرلیں کیونکہ اڈوبی پروگرام کے پرانے ورژن میں ایک سکیورٹی نقص کی نشاندہی کی گئی ہے۔
دنیا بھر میں اربوں افراد یہ سافٹ ویئراستعمال کرتے ہیں۔

سکیورٹی کے تحقیقات کاروں کا کہنا ہے کہ کمپیوٹر ہیکر پی ڈی ایف کے اس نقص کا فائدہ اٹھاتے ہوئے کمپیوٹر استعمال کرنے والے کے ہارڈ ویئر تک رسائی حاصل کرسکتے ہیں جس کے ذریعے ویب صارف کو دیگر نقصانات پہنچائے جاسکتے ہیں۔

تاہم ابھی تک اس سکیورٹی نقص کے ذریعے کسی کا کمپیوٹر ہیک کیے جانے کی اطلاع نہیں ملی ہے۔

اڈوبی ریڈر کے ذریعے پی ڈی ایف دستاویزات کو براؤزر ونڈو میں کھولا جاسکتا ہے۔

اڈوبی کا یہ نقص جرمنی میں ’کیوز کمپیوٹر کلب‘ نامی ہیکر گروپ کے سالانہ اجلاس میں سامنے آیا۔

سیمنٹک سکیورٹی کمپنی کے تحقیقات کار ہون لو کا کہنا ہے کہ اڈوبی کے اس نقص کا جس سطح پر استحصال ممکن ہے، وہ باعث حیرت ہے۔

اڈوبے ریڈر کا ورژن 8 اپ گریڈ کرنے سے کمپیوٹر صارف پچھلے ورژن کے نقصانات سے بچ سکتے ہیں۔

ماخوذ بی بی سی