انٹارکٹیکا پگھل رہا ہے برطانوی سائنسدانوں نے دعویٰ کیا ہے کہ گلوبل وارمنگ کی وجہ سےانٹارکٹیکا میں قطبین پر موجود برف اندازے سے زیادہ تیزی سے پگھل رہی ہے۔ برطانوی آرکٹک سروے سے تعلق رکھنے والے سائنسدانوں کو یقین ہے کہ دنیا بھر کے سمندروں کی سطح میں برف کے پگھلاؤ کی وجہ سے ہونے والے اضافے کی رفتار لگائے جانے والے اندازوں سے کہیں زیادہ ہے۔ خیال کیا جاتا ہے کہ گزشتہ پچاس برس کے دوران انٹارکٹیکا کے جزیرہ نما میں سمندری برف کا تیرہ ہزار مربع کلومیٹر حصہ پانی بن چکا ہے۔ ان تحقیقات کا اعلان ماحولیاتی تبدیلی سے متعلق منعقد ہونے والی ایک کانفرنس میں کیا گیا۔ انٹارکٹیکا کے جزیرہ نما میں سمندری برف کے پگھلنے سے سمندری گلیشئیروں کو روکنے والی دیوار ختم ہوتی جا رہی ہے اور اس کے نتیجے میں گلیشئیر پہلے سے چھ گنا زیادہ رفتار سے سمندروں میں تیر رہے ہیں۔ براعظم انٹارکٹیکا کا مغربی حصہ بھی ماحولیاتی تبدیلی کا شکار ہے اور سمندر کا گرم پانی وہاں موجود برف کی تہہ کے نچلے حصے کو نقصان پہنچا رہا ہے۔
