اس سے پہلے کہ شبِ تار کو دن لکھنے لگوں

اس سے پہلے کہ شبِ تار کو دن لکھنے لگوں
اس سے پہلے کہ گُھٹن کو بھی سکوں کہنے لگوں
اس سے پہلے کہ میں حالات کا دم بھرنے لگوں
اس سے پہلے کہ ستم گر کا بھرم رکھنے لگوں

ربِ کعبہ مرے ہاتھوں سے قلم لے لینا
انگلیاں شل ہوں مری جسم سے دم لے لینا

اس سے پہلے کہ عقیدوں کی تجارت سیکھوں
اس سے پہلے کہ میں طاقت کی عبادت سیکھوں
اس سے پہلے کہ حقائق میں خیانت سیکھوں
اس سے پہلے کہ تعلق میں رذالت سیکھوں

ربِ کعبہ مرے ہاتھوں سے قلم لے لینا
انگلیاں شل ہوں مری جسم سے دم لے لینا

اس سے پہلے کہ میں الفاظ کی حرمت بیچوں
فکر کا سودا کروں ذات کی عزت بیچوں
عیش گزاروں کے عوض عزم کی قوت بیچوں
اس سے پہلے کہ میں ادراک کی دولت بیچوں

ربِ کعبہ مرے ہاتھوں سے قلم لے لینا
انگلیاں شل ہوں مری جسم سے دم لے لینا

نظم، محمود شام
​