آپﷺ آئے تو مہک اٹھا بصیرت کا گلاب ۔۔ فرحت حسین خوشدل

آپﷺ آئے تو مہک اٹھا بصیرت کا گلاب
خُلق کی خوشبو میں پوشیدہ ہے سیرت کا گلاب

شخصیت کو آپ کی طہٰہ کہا فرقاں کہا
آپﷺ ہیں سارے جہاں کے حق میں رحمت کا گلاب

آپﷺ کی طاعت میں پوشیدہ ہے رب کی بندگی
فاَتَّبِعُوْنِیْ میں پنہاں ہے اطاعت کا گلاب

آپﷺ آئے تو جہالت کے اندھیرے مٹ گئے
مل گیا ہے نسلِ آدم کو ہدایت کا گلاب

آپﷺ آئے تو زباں کو تابِ گویائی ملی
آپﷺ نے بخشا زمانے کو فصاحت کا گلاب

آپﷺ نے آ کر بدل دی کفر و ظلمت کی فضا
ہر طرف کھلنے لگا دنیا میں وحدت کا گلاب

آپﷺ نے طائف کی وادی میں دعا یہ رب سے کی
کھل اٹھے ویران وادی میں بھی امّت کا گلاب

تیرگیِ نسلِ آدمؑ نورِ حق سے مٹ گئی
آپ نے بتلایا کیا ہے آدمیّت کا گلاب

حضرتِ صدیقؓ، فاروقؓ، اور عثمانؓ و علیؓ
سارے ہی اصحاب پر یکساں تھا شفقت کا گلاب

عمر بھر نعتِ نبی خوشدل ؔ رہے لب پر ترے
یونہی بس کھلتا رہے ہونٹوں پہ مدحت کا گلاب
٭٭٭
فرحت حسین خوشدل ۔۔۔ آئینۂ عقیدت​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ ۔ جزاک اللہ

 

اللہ تعالیٰ آپ کو بھی جزائے خیر عطا کرے آمین