آخر روٹی ہی کیوں؟

واصف بھائی میں آپ کی بات سے بالکل اتفاق نہیں کرتی۔ زمین پہ جو دوسری مخلوقات ہیں وہ تو صبح سے شام ہی روٹی یعنی کھانے کے لیئے کرتی ہیں یہ تو انسان ہی ہے جس کو کھانے کے علاوہ دولت اکٹھی کرنے کا اور جائیداد بنانے کی دھن سوار رہتی ہے۔ ہاں اگر آپ کی مراد واقعتاً روٹی سے ہی ہے یعنی وہ جو ہم آٹا گوندھ کے بناتے ہیں تو اس میں سے صرف روٹی کھانے والی مخلوقات شامل کر لیں۔

 

یہ چیز تو حضرت آدم سے ہی چلی آ رہی ہے۔

واقعہ جس طرح سنا ہے اس کے مطابق تو حضرت آدم نے جب روٹی بنائی تو وہ بھاگی اور حضرت آدم اس کے پیچھے بھاگے۔

 

عاطف بھائی ۔ اب آپ بڑے ہوگئے ہیں۔ توتلی زبان چھوڑ دیں ، جملے پورے لکھا کریں اور روٹی کو روٹی ہی کہا کریں۔ روتی نہیں

 

آٹے کا بحران۔ ذمہ داروں کو احساس کیوں نہیں ہوتا؟

ایک زرعی ملک میں آٹے کا بحران عام طور پر ناقابل قبول حقیقت کا درجہ رکھتا ہے لیکن وطن عزیز میں جس طرح گندم اور آٹے کی قلت کا کئی ہفتے گزر جانے کے بعد بھی کوئی حل نہیں نکالا جاسکا اس کیلئے محض یہ کہہ دینا کافی نہیں کہ باہر سے گندم کا جہاز پہنچ گیا ہے اس لئے چند روز میں اس بحران پر قابو پا لیا جائے گا۔

ایک لطیفہ یہ ہے کہ اسی سال گندم کی فصل کے بارے میں کہا گیا تھا کہ ریکارڈ توڑ ہوئی ہے یہ سمجھنے کے لئے کہ اتنی گندم کہاں چلی گئی صرف اتنا جان لینا ہی کافی ہوگا کہ چند سکہ بند بے رحم اسمگلر ہمارے بچوں کی خوراک پڑوسی ملکوں کو اسمگل کر کے ڈالر کمانے میں اتنے دلیر ہوچکے ہیں کہ انہیں حکومت کی کوئی ایجنسی بھی نہیں روک سکتی۔ ایسے ملک گیر بحران پیدا کرنے کے ”ماہر“ کچھ لوگ وہ ہیں جن کے گوداموں میں کسی بھی جنس کے لاکھوں ٹن ذخیرہ کرنے کی گنجائش ہے اور حکومت کے ذمہ دار اہلکاروں کی پشت پناہی اس گنجائش میں روزبروز اضافہ کرتی جا رہی ہے۔ ملک کے سولہ کروڑ عوام ہر روز پانچ دس کلو آٹے کیلئے گھنٹوں خوار ہوتے رہتے ہیں پھر بھی کسی کو چند کلو آٹا (سونے کے بھاؤ) ملتا ہے اور کسی کو وہ بھی نہیں ملتا لیکن شام کو حکومتی اہلکاروں کی جانب سے بھانت بھانت کی مضحکہ خیز وضاحتیں ٹی وی پر دکھا دی جاتی ہیں جن کا مسئلے کے حل میں کوئی حصہ نہیں ہوتا۔ کوئی متعلقہ ذمہ دار قطعیت سے بات کرنے سے اسلئے کتراتا ہے کہ جن لوگوں نے ملک کی گندم افغانستان، ایران اور بھارت کو اسمگل کی ہے وہ کسی بھی حکومتی صاحب اختیار سے زیادہ طاقتور ہیں۔

ستم ظریفی ملاحظہ فرمائیں کہ اپنی گندم سستے داموں بیرون ملک بھجوا کر اس سے دگنی قیمت میں دوسرے ملکوں سے گندم درآمد کرنے کو بھی یہ لوگ اپنی بہادری کے طور پر پیش کرتے ہیں۔ دراصل جب صاحبان اختیار کے دل سے عوام کا درد نکل جائے تو انہیں بھوکا مرتا ہوا انسان محض تفریح طبع کا ایک ذریعہ یا کوئی مشینی منظر لگنے لگتا ہے۔

سوال یہ ہے کہ کیا خدانخواستہ صاحبان اختیار و اقتدار کی پوری کی پوری فوج میں کوئی ایک بھی ایسا نہیں جس کے دل میں کروڑوں انسانوں کی تکلیف پر کوئی ٹیس اٹھتی ہو۔ کیا کسی میں بھی پوری قوم کو بھوک کے بے رحم سمندر میں دھکیل دینے والے ہاتھوں کو توڑ دینے کی طاقت نہیں۔ آخر غریب لوگ کب تک اپنا کام کاج چھوڑ کر دو کلو آٹے کے لئے سارا سارا دن ایک جگہ سے دوسری جگہ دھکے کھاتے پھریں گے؟

روزنامہ جنگ، ادارتی صفحہ۔ 11 جنوری 2008