آئینوں میں عکس نہ ہوں تو حیرت رہتی ہے

آئینوں میں عکس نہ ہوں تو حیرت رہتی ہے
جیسے خالی آنکھوں میں بھی وحشت رہتی ہے

ہر دَم دُنیا کے ہنگامے گھیرے رکھتے تھے ،
جب سے تیرے دھیان لگے ہیں ، فرصت رہتی ہے

کرنی ہے تو کُھل کے کرو ‘ انکارِ وفا کی بات
بات ادھوری رہ جائے تو حسرت رہتی ہے

شہرِ سخن میں ایسا کُچھ کر ‘ عزت بن جائے
سب کُچھ مٹی ہوجاتا ہے ‘ عز ّت رہتی ہے

بنتے بنتے ڈھ جاتی ہے دل کی ہر تعمیر
خواہش کے بہروپ میں شاید قسمت رہتی ہے
​