میرا آخری کالم ۔۔۔ رضی طاہر

( …… میرا آخری کالم …… )
​

موت سے اسکو ڈرایا جاسکتا ہے جس کے دل میں موت کا خوف ہو۔ جس کے دل میں جذبہ شہادت ہو اسے نہ ڈرایا جاسکتا ہے نہ دھمکایا جاسکتا ہے اور نہ ہی ایسی مذموم حرکات سے مشن سے پیچھے ہٹایا جاسکتا ہے۔
”میں ڈاکٹر محمد طاہرالقادری کا کارکن ہوں اور پاکستان کو حقیقی معنوں میں جناح کا پاکستان بنانے کیلئے ان کے شانہ بشانہ کھڑا ہوں“
جناح۔۔ اتحاداور تنظیم کا درس دیتے رہے اور ہمارے نظام نے قوم کو منتشر اور پارہ پارہ کردیا، ہم ایک قوم نہ رہے بلکہ18کروڑ سروں کا ہجوم بن کر رہ گئے۔۔۔ !!
جناح۔۔ پارلیمنٹ کے اجلاس میں چائے پینے کے بھی مخالف تھے جبکہ یہاں پارلیمنٹ لارجز میں شراب کھلے عام چلتی ہے۔ بیرون ملک سے لائی گئی لڑکیاں کرپٹ نظام کی پیداوار حرام اشرافیہ کی راتوں کو رنگین بناتی ہیں۔
جناح۔۔ ایک کرسی سرکاری خرچے میں اپنے گھر کیلئے خریدنے سے منع فرمادیتے مگر آج سرکاری خرچ پر پوری کی پوری فیملیاں عیاشیاں کررہی ہیں۔ شہنشاہ کا بیٹا ہیلی کاپٹر سے نیچے پاؤں نہیں رکھتا۔ بیٹی سرکاری خرچ کو اپنا بینک بیلنس سمجھتی ہے اور رشتہ دار اپنا حق۔۔ بیرون ملک دوروں میں پٹواریوں کی پوری ٹیم کے ہمراہ اربوں ڈالر اڑا دئیے جاتے ہیں۔
جناح۔۔ انتہاپسندی کو مہلک مرض سمجھتے تھے مگر آج مساجد، امام بارگاہیں، تبلیغی مراکز، بازار، گلی کوچے انتہاپسندی اور دہشت گردی کی آگ میں جل رہے ہیں۔اس آگ میں نہ جانے کتنے بچے اپنے باپ کی شفقت، ماں کی محبت سے محروم ہوئے۔ نہ جانے کتنی بہنیں بھائیوں کے سائے سے محروم ہوئیں اور نہ جانے کتنی مائیں ہیں جن کا کلیجہ اپنے بچے کے بچھڑ جانے کے غم میں چھلنی چھلنی ہے۔
جناح کے پاکستان میں کرپشن، طبقاتیت، رشوت، سفارش، اقرباء پروری اور خاندانی بادشاہت کی گنجائش نہیں!
سماج دشمنوں،بھتہ خوروں، لٹیروں، دہشت گردوں اور انتہاپسندوں کیلئے کوئی جگہ نہیں۔۔۔
جناح کا پاکستان بکے ہوئے صحافیوں، بے ضمیر سیاستدانوں، کرپٹ اشرافیہ، دین فروش ملاؤں اور جعلی پیروں کیلئے بھی تنگ ہے۔
میں جناح کے پاکستان کا حامی اور نظام کا دشمن ہوں۔۔اس فرسودہ نظام نے ان تمام برائیوں کو تحفظ فراہم کیا، چونکہ یہ نظام جناح کے پاکستان کی موجودہ مسخ شدہ تصویر کا ذمہ دار ہے اسلئے میں یقینا طاہرالقادری کیساتھ فرسودہ نظام کی تعفن زدہ عمارت کو اکھاڑ پھینکنے کی جدوجہد کررہا ہوں۔ میں جناح کے پاکستان کو جناح کی عظیم فکر کے تابع دیکھنا چاہتا ہوں۔۔۔
میں وقت کے فرعون صفت حکمرانوں، بے ضمیرمقتدر طبقے اور یزید وں سے مخاطب ہوں۔
میری شناخت کرلو !! مجھے جی بھر کے دیکھ لو!!
میں طاہرالقادری کا کارکن ہوں۔
میں سینہ تانے کھڑا ہوں۔ تم ڈرا نہیں پائے ہو نہ ڈرا پاؤ گے۔
تم ہمیں مشن سے ہٹا نہیں سکے ہو نہ ہٹا سکو گے۔۔
یہ وہ کارکن ہیں کہ جہاں طاہرالقادری کا پسینہ گرے وہاں خون بہا دیں، وہ اشارہ کریں تو گردہ کٹا دیں اور اسے کی طرف میلی آنکھ اٹھے تو آنکھیں نکال دیں“ ۔۔۔ جی ہاں یہ وہ کارکن ہیں اور میں ان کارکنوں میں سے ہوں جن پر تمہارے بھیجے ہوئے زر خرید غلاموں اور پالتو کتوں نے رات کی تاریکی میں گولیاں برسائیں، ظلم کیا۔۔۔ میں سلام پیش کرتا ہوں سانحہ ماڈل ٹاؤن میں اپنے خون شہادت سے انقلاب کی بنیاد رکھنے والے14سپوتوں کو جن میں میری دو عفت مآب بہنیں بھی شامل ہیں، وہ یزیدی لشکر کے سامنے جھکے نہیں، پیچھے ہٹے نہیں اور ان کے مذموم مقاصد کو بالاخر ناکام بنایا۔ نہتے رہ کر مقابلہ کیا۔ عقل سے عاری کالے بیلوں نے اپنے مالک کے ہانکنے پرجب گولیاں برسا دیں تو انہوں نے سینے پیش کردیئے۔۔۔ جذبوں اورولولوں، شجاعت و بہادری کی وہ تاریخ لکھ دی کہ ہمیشہ وہ یاد کیے جائیں گے اور شرافت کا لباس پہنے ہوئے فرعونوں پر لعن طعن ہوتا رہے گا۔
اے تخت لاہور کے بادشاہ !!
اے 14انقلابیوں کے لہو سے اپنی پیاس بجھانے والے ہلاکو خان !!
اے غریب کی عزتیں لوٹ کر تماشہ کرنے والے اداکار۔۔۔ !!
اے جعلی پولیس مقابلوں میں بے گناہ قتل کروانے والے بدمعاش۔۔۔!!
اے لیڈی ہیلتھ ورکرز اور نرسز پر لاٹھی چارج کروانے والے نامرد۔۔!!
سنو!! تمہاری تاریک راتوں میں اگر کسی روز میں بھی مارا گیا تو ایسا کرنا کہ
میرے جسم کے ٹکڑے ٹکڑے کردینا۔۔۔!
پھر انہوں اپنے اتفاق فاؤنڈری کی بھٹی میں جلا دینا۔۔۔!!
پھر جلی ہوئی راکھ کو اپنی غرور کی تسکین کیلئے ہوا میں پھینک دینا۔۔۔!!
مجھے رب ذوالجلال کی عزت کی قسم ۔۔ پھر لاہور کی فضا میں میری راکھ کے ذروں کا انقلابی رنگ دیکھنا۔
تمہارے دیئے ہوئے لیپ ٹاپ کی رشوت نوجوان تمہارے محل پر دے ماریں گے اور تمہیں لاہور کی سڑکوں پر گھسیٹیں گے۔
تمہارے دکھائے ہوئے خواب نوجوان اپنے زور بازو سے پورے کریں گے اور تمہاری آنکھیں نکال دیں گے۔
ہا ں سن سکتے ہو تو سنو۔۔ جذبے ابھی زندہ ہیں۔۔ ولولے ابھی زندہ ہیں۔۔
جیالے ابھی زندہ ہیں۔۔ رکھوالے ابھی زندہ ہیں۔۔
یہ تحریر انقلابی کی ہے۔ انقلابیوں کے خاموش جذبے بھی طلاطم اور زلزلے بپا کردیا کرتے ہیں یہ پھر بھی الفاظ ہیں۔۔۔ یہ زندہ وجاوید لفظ ہیں۔۔۔ اگر تم انقلاب سے قبل بھی یہ لفظ پڑھ لو تو میرا ایمان ہے کہ روز انقلاب تک بھی تمہیں ہر روز پاگل پن کے دورے پڑھیں گے۔ میرے کالم کی کوئی ترتیب نہیں۔ یہ بے ترتیب الفاظ کا مجموعہ ہے۔ یہ لفظ نہیں جذبے ہیں۔۔ انقلاب سے قبل یہ میرے آخری الفاظ ہیں۔ میں اگر شہید نہ ہوا تو انقلاب کے بعد لکھوں گا۔ اگر شہید ہوگیا تو یہ تحریر تاریخ کے ماتھے کا جھومر بن کر صدیوں پڑھی جاتی رہے گی۔
میں چلنے سے قبل بتانا چاہتا ہوں کہ میں نے انقلاب کے راستے کو کیوں اپنایا۔ میں نے اپنی بے حسی کی زندگی عیاشیوں میں گزارنے پر راہ انقلاب پر سفر کو ترجیح کیوں دی؟ اور میں نے ستمبر2013سے لیکراگست2014تک 40ہزار کلومیٹر کا سفر کراچی تا خیبر کیوں کیا؟ میں نے طاہرالقادری کی آواز پر لبیک کیوں کیا؟ بتانے تو اتنا ہی کافی ہے کہ گجرات کے ایک زمیندار نے معصوم بچے کے بازو کاٹ دئیے اسلئے میں انقلاب کیلئے نکلا ہوں مگر میں قوم کے تمام زخموں کے پیچھے چھپی تمہاری شرافت کے پردے چاک کرنا چاہتا ہوں۔ میں انقلاب کیلئے نہیں نکلوں گا اگرتم انصاف کے درج ذیل تقاضے پورے کردو۔۔۔
1: میلسی میں مہنگائی اور حالات کی ستم ظریفی سے تنگ آکر نہر میں کود کر جان دینے والی پانچ بہنوں کا قصور بتادو؟
2: میری عفت مآب بہن تنزیلہ امجد شہید سمیت14بے گناہ شہریوں کے قتل کا جواز بتادو؟
3: کراچی کی فٹ پاتھوں پر روزانہ بے گناہ ہلاک ہونے والے شہریوں کو انصاف اور بسنے والوں کو امن دیدو
4: ہزارہ وال برادری کی نسل کشی کرنے والے عناصر کو ننگا کرو اور انہیں عدالتوں میں پیش کرکے منطقی انجام تک پہنچادو
5: پانچ سالہ فاطمہ کیساتھ زیادتی کرنے والے شیطان صفت درند ہ کو پکڑ کر کٹہرے میں لے آؤ۔
6: شہید بینظیر بھٹو اور حکیم سعید کے قاتلوں کو گرفتار کرکے چوک پر پھانسی کی سزا دو۔
7: سیالکوٹ میں کچھ سال قبل دن دیہاڑے درندگی سے قتل ہونے والے دو بھائیوں کی ماں کو عدل دو۔
8: خودکش دھماکوں میں جام شہادت نوش کرنے والوں کے لواحقین کو انصاف دو اور ان کے قاتلوں، قاتلوں کے معاونین اور سربراہان کو عبرت کا نشان بنادو، ان کے تنظیموں کا جڑ سے اکھاڑ پھینکو، اندرون و بیرون ملک ان کے فنڈز کے ذرائع تلاش کرکے ختم کردو۔
9: ان محرکات کو تلاش کرکے ختم کردو جس کی وجہ سے ایک ماں نے اپنے بچوں کے گلے کاٹ دئیے۔
10: جاگیرداروں سے جاگیریں چھین کر مزارعوں میں بانٹ دو جو ظلم اور استحصال کی چکی میں پس رہے ہیں۔
12: اپنی ملوں سمیت پبلک سیکٹر اور تمام پرائیوں ملوں اور فیکٹریوں کے ملازمین کو فیکٹری کے منافع کا حصہ دار بنادو۔
13: جعلی پولیس مقابلے ختم کروا ؤ، پولیس سیکٹر میں تمام سفارشی اور سیاسی بھرتیوں کا خاتمہ کرکے میرٹ پر بھرتیاں کرو۔
14: ملک کے تمام نونہالوں کو ایک نظام تعلیم دو۔
15: طبقاتیت کا ہر سطح پر خاتمہ کرکے عام مخلص اور پڑھے لکھے شخص کو اسمبلی میں نمائندگی کیلئے قوانین وضع کرو۔

تم نے یہ سب کچھ نہیں کیا۔ یہی میرا نقلاب کیلئے صف آراء ہونے کا جواز ہے۔ یہ سب کچھ شروع کرنے میں 24گھنٹے لگتے ہیں۔ مگر یہ سب کچھ کرنا تمہارے اور تمہاری بکاؤ کابینہ کیلئے پاؤں میں کلہاڑی مارنے کے مترادف ہے۔

تاریخ کے صفحات میری ان سطور پر گواہی دیں گے کہ طاہرالقادری کیساتھ نکلنے والے کیوں نکلے ہیں۔ کون سی تڑپ، کون سا جذبہ انہیں سڑکوں پر لے آیا۔
جی ہاں۔۔۔۔ مزدور اور مزدوروں کے بیٹے، بیٹیاں اپنے حصے کی تاریکیوں کو اجالے میں بدلنے نکلے ہیں۔
وطن کے قابل فخر اور محنتی کسان، مزارعین اور ان کے بیٹے، بیٹیاں غلامی کی زنجیریں توڑنے نکلے ہیں۔
چھوٹے تاجر، سرکاری ملازمین اور کم تنخواہ والے پاکستانی عوام اس بے انصافی اور استحصال کو جڑ سے اکھاڑنے نکلے ہیں۔
طالب علم جن کے ہاتھ میں قلم اور کتابیں ہیں وہ طبقاتیت کے خاتمے اور ایک نظام تعلیم کیلئے نکلے ہیں۔
قوم کے جوان بیروزگاری سے مایوس ہوکر امید کے دئیے جلانے نکلے ہیں۔
اقلیتی برادری قائد اعظم کے وعدے جس کے مطابق برابر حقوق دیئے جانے کا وعدہ ہے اس کی تکمیل کیلئے نکلے ہیں۔
وکلا، قانون دان آئین کی اپنی اصل روح کیساتھ بحالی کیلئے نکلے ہیں۔
مشائخ، علمائے کرام اسلام کو پاکستان میں نافذ کرنے نکلے ہیں۔
گویا۔۔۔۔ بچے، بوڑھے، جوان، خواتین اور ہر عمر کے پاکستانی پاکستان بچانے نکلے ہیں۔۔۔۔۔!!
میرا آخری کالم ایک اذان ہے۔ بیداری شعور و احساس کیلئے ننھے ابابیل کی طرح کی ایک کوشش ہے۔ ہم نے ہمیشہ شب ظلمات کے شکوؤں اور شکایات پر ہی زور دیا، ہم نے اپنے حصے کے دیپ جلانے کی سعی نہ کی۔ طاہرالقادری ہو یا کوئی بھی جو ظلم کیخلاف اپنی آواز کو بلند کرے اس کا ساتھ دینا ایسا ہی ہے جیسے اپنے حصے کی شمعیں روشن کرنا۔اپنے حصے کے دیپ جلانا۔
آخر کب تک ہم لاشیں اٹھاتے رہیں گے؟
آخر کب تک بھوک سے نڈھال بچے مرتے رہیں گے؟
آخر کب تک وطن کی گلیاں اندھیروں میں رہیں گی؟
آخر کب تک فٹ پاتھوں پر خون بہتا رہے گا؟
آخر کب تک بہنوں اور بیٹیوں کی عزتیں تار تار ہوتی رہیں گی؟
یاد رکھیں معاشرے برائی کیساتھ قائم رہ سکتے ہیں مگرظلم کیساتھ نہیں۔ اگر ہم نے بڑھ کر ظلم کا بازو نہ توڑا تو ہمیں معاشرے سے ہاتھ دھونا پڑے گا۔ ظلم کیخلاف خاموش رہنے والی قومیں کبھی زندہ نہیں رہ سکتیں۔لہذا اٹھیں اس ہمہ گیر ظلم کے خلاف انقلاب برپا کردیں۔
انقلاب ہی بے گھروں کو گھر دے گا۔
انقلاب ہی بیروزگاروں کو روزگار دے گا۔
انقلاب ہی استحصال کا خاتمہ کرے گا۔
انقلاب ہی پاکستان کو عالمی سطح پر ایک خود مختار ریاست بنائے گا۔
انقلاب ہی پاکستان کو ایسی قیادت فراہم کرے گا جو بڑی سے بڑی قیادت کو NOکہہ سکے۔
انقلاب ہی مجھے اور آپ کو سرخرو کرے گا اور ہم اپنی نسلوں کو ایک آزاد اسلامی جمہوریہ پاکستان دے سکیں گے۔
میں انشاء اللہ پاکستان کیلئے نکلا ہوں۔ کشتیاں جلا کر نکلا ہوں۔ زندہ رہا توپاکستان میں حقیقی جمہوری سیاسی رویوں کے فروغ پا جانے کے بعد اور نئے سیاسی و انتخابی نظام میں ایک کامیاب سیاستدان بنوں گا۔ اللہ ہمارا حامی و ناصر

(رضی طاہر ۔ اٹک)​

 

رضی طاہر کے جذبوں کو سلام۔
ہر اس پاکستانی کے عزم و ہمت کو سلام جو کروڑوں غریبوں کوظالموں و غاصبوں سے انکے حقوق واپس دلانے کے لیے برسرِ پیکار ہے
جیسا کہ میں نے پہلے بھی کہیں لکھا تھا ۔
انقلاب کبھی بھی ایک لیڈر نہیں لاتا۔ بلکہ رہنما صرف ایک سمت دکھاتا ہے۔ میکنزم دکھاتا ہے۔ طریقہ کار سمجھا دیتا ہے۔ ماقبل انقلاب اور ما بعد انقلاب کے تقاضوں کو واضح کرسکتا ہے۔ مستقبل میں ترقی و کامیابی کے خطوط سے آگہی دے سکتا ہے۔
لیکن
انقلاب لانے کے لیے اس قوم کو آگے بڑھ کر قوت ظلم و بدعنوانی کے نظام کا بانیوں اور محافظوں سے چھیننا ہوگی۔جب تک قوم کی بھاری اکثریت اپنے حقوق کی بازیابی کے لیے اٹھ کھڑی نہیں ہوتی ۔ کوئی بڑے سے بڑا لیڈر انقلاب لاکر اس قوم کی جھولی میں نہیں ڈال سکتا۔
البتہ رضی طاہر بھائی اور ان جیسے ہزاروں لاکھوں نوجوان انشاءاللہ تاریخ میں اپنا نام انمٹ کرجائیں گے۔
اللہ کریم ہمیں بطور قوم ظلم سے نفرت اور ظالم کے خلاف صدائے حق بلند کرنے کی توفیق اور اپنے حقوق کا شعور عطا فرمائے۔ آمین

 

میں آصف بھٹی بھائی کی اس بات سے متفق ہوں کہ پوری اسلامی دنیا کی نظریں اس وقت پاکستان پر لگی ہیں۔ بلکہ اغیار کی نظریں بھی اس وقت پاکستان پر گڑی ہیں۔
امت مسلمہ کے تنِ مردہ میں اگر پھر سے کہیں سے روح ِ حیات پھونکی جاسکتی ہے۔ تو وہ شہ رگ پاکستان ہے۔ پاکستان کے اندر امت مسلمہ کی قیادت کرنے کے تمام اوصاف موجود ہیں اور پوری اسلامی دنیا میں پاکستان کی حیثیت اپنی تمام تر خامیوں کے باوجود ایک بڑے اور بہادر بھائی جیسی ہے۔
اگر ہماری سمت ایک بار درست ہوگئی۔ قوتِ نافذہ ایک دیانتدار اور اہل قیادت کے پاس آگئی جو بےرحم احتساب کے ذریعے نہ صرف لوٹی ہوئی دولت واپس لاسکے۔ بلکہ کرپشن کو روک کر غریب عوام کو انکے بنیادی حقوق رہائش، خوراک، علاج ، تعلیم ، تحفظ جیسے آئینی حقوق کو یقینی بنا سکے تو چند سالوں میں ہم امتِ مسلمہ کی قیادت کے قابل ہوسکتے ہیں۔ انشاءاللہ العزیز
وقت یہی ہے۔ کیونکہ " خوش قسمتی " بار بار دروازہ نہیں کھٹکھٹاتی ۔

 

محبوب بھائی ۔ ذرا ایمانداری سے بتائیے گا ۔۔ چند فیصد باشعور لوگوں کو چھوڑ کر سندھ، بلوچستان، پنجاب کے دیہی پنجاب میں ووٹ دینے کا معیار کیا ہے؟
کاش پاکستانی عوام ایک بار''ووٹ'' کے ذریعے ترقی پانے والے ممالک میں ''ووٹ کا نظام اور امیدوار کامعیار''سمجھنے کی زحمت کر لیتے تو انہیں معلوم ہوتا کہ جمہوریت کیا ہوتی ہے۔
جس نظام نے 35-40 سال سے سوائے غربت، افلاس، بدامنی، دہشگردی، لوڈ شیڈنگ ، مسائل اور مایوسی کے اور کچھ نہیں دیا ۔۔۔ اور بطور نظام اپنی ناکامی ثابت کردی ہو
جاہل سے جاہل بلکہ بھی دوبارہ ایسے راستے پر جانے سے گریز کرتا ہے جہاں سے اسے ایک بار ناکامی و مایوسی کاسامنا ہو۔
لیکن خداجانے ہم عقل و شعور کے کس ''اعلی مقام '' پر فائز ہیں کہ اسی اوکھلے میں سر دیے جانے ، چند خاندانوں، چند ہزار کرپٹ اشرافیہ کی نسل در نسل غلامی پر مصر ہیں ۔ جو آئین کی دھجیاں اڑاتے ہوئے اسماقتدار کے ایوانوں میں پہنچتے ہیں۔ کیا 62-63 آئین کا حصہ نہیں ؟
کیا موجودہ حکمرانوں سمیت 60-70 فیصد یا اس سے بھی زیادہ 62-63 اور 218 پر پورے اترتے ہیں ؟
کیا یہ نظام ہے جس میں حلقے کا کرپٹ ترین غنڈہ ، بدمعاش اور امیر کروڑوں لگا کر اسمبلی پہنچ جائے اور شریف ، لائق، اعلی تعلیم یافتہ کلرکی کرتا رہے ؟
آپ اسکے نظام کہتے ہیں کہ عوام کے مسائل حل کرنے کے لیے بلدیاتی ڈھانچہ تک نہ بنایا جائے اور کروڑوں اربوں ترقیاتی فنڈز ممبران اسمبلی کی جیب میں جائیں؟ میرا چیلنج ہے چائنہ، ایران ترکی سمیت دنیا کز کسی ترقی پذیر یا ترقی یافتہ ملک میں ترقیاتی فنڈز کا یہ نظام دکھا دیں ؟
جمہوریت یہ ہے کہ اختلاف رائے رکھنے والے کو سینوں ، گردنوں اور منہ میں سیدھی گولیاں ماردی جائیں ؟ آپ جناب اسکو نظام کہتے ہیں ؟
جمہوریت یہ ہے یوم شہداء کی فاتحہ خوانی کرنے والوں کو روکنے کے لیے پورا پنجاب بلاک کردیں؟
محترم ۔۔ جمہوری سوچ والے لوگ اور ہوتے ہیں۔ جن کی سوچ میں جمہوریت ہوتی ہے۔ عوام کی رائے کا احترام ہوتا ہے وہ 20-30 ہزار عوام کے سڑکوں پر آجانے سے بھی غیرت اور جمہوری اقدار کا مظاہرہ کرتے ہوئے استعفی دے کر گھر چلے جاتے ہیں کہ اب میری عوام مجھے پسند نہیں کرتے ۔یہاں گولیوں کے منہ کھول دیے جاتے ہیں ۔
آئین کے پہلے 40 آرٹیکل پڑھ کر یہاں اردو ترجمہ لکھ دیں ۔۔ جس میں ریاست و حکومت کا فرضِ منصبی ہے کہ وہ عوام کے جان مال، عزت آبرو کے تحفظ کی ضامن بنے ۔ تعلیم، علاج اور محفوظ و خوشحال مستقبل کی ضمانت ہو۔
کیا یہ نظام آئین کے ان تقاضوں کو پورا کرچکا ہے ؟
اگر نہیں تو کیا قران و حدیث کا کوئی حکم ہے چند ہزار کرپٹ اشرافیہ کے جال میں پھنس کر محرومیوں، مایوسیوںاور غلامیوں میں نسل در نسل پھنسےرہو؟
اگر غلامی ہی درکار تھی تو تحریک پاکستان کیوں چلائی ؟ غلامی ہی کرنی تھی تو انگریزوں یا ہندووں کی ہی کرتے رہتے۔۔۔ کھانا تو تب بھی ملتا تھا۔ نماز روزہ کی اجازت تو تب بھی تھی۔
جو اس نظام سے مطمئن ہوکر غلامی سے خوش ہیں۔ انہیں اپنی سوچ مبارک ۔
لیکن اگر اس ملک کے لاکھوں لوگ اس نظام سے مطئن نہیں اور وہ تبدیلی چاہتے ہیں تو ان کا بھی جمہوری حق ہے کہ وہ ہر قانونی طریقہ سے اپنی آواز بلند کریں۔
لیکن تاریخ یاد رکھے گی کہ گولیاں چلانے والے نظام کی حمایت میں کون کون بولا !
اور اپنے حق کے لیے شہید ہوجانے والوں کے ساتھ کون بولا !
اپنا اپنا کردار ادا کرتے چلے جارہے ہیں۔ ظالمانہ ، فرعونی و یزیدی نظام کو تحفظ دینے والے بھی ۔۔ اور مظلوم، موسوی و حسینی نقشِ پا پر چلے والے بھی !
نظام سے مطمئن ہوکر لکیر کے فقیر بنے رہنے والوں سے اتنی گذارش ضرور ہے کہ علامہ اقبال کے فلسفہ انقلاب کو ضرور پڑھیں اور اگر پڑھ چکیں ہیں تو موجودہ حالات کے تناظر میں غوروخوض ضرور کریں۔

 

یہی ہمارا المیہ بھی ہے ۔۔ جس پر رونا بھی چاہیے
ایک مصلح ، ایک اعلی تعلیم یافتہ سکالر، ایک ماہر قانون دان، ایک بہترین منتظم ۔۔۔ ہمارے نزدیک ایک ثوابی آدمی تو قابل قبول ہے۔ اسکی تقریریں سن لی جائیں۔ اسکی کتابیں پڑھ لی جائیں۔ اسکی تعریفیں کردی جائیں۔
لیکن ایوانِ اقتدار کے لیے ہمیں وہی جاگیردار، رسہ گیر، بنک ڈیفالٹرز، کرپٹ ، اربوں لوٹ کر دنیا کے درجنوں ممالک میں پراپرٹیاں اور کاروبار بنانے والے کے سپرد کرنا پسند کرتے ہیں۔
کیا ایک ایسا شخص جو اپنی تمامتر خوبیوں اور اخلاص کا حامل ہے۔ اسکو بطور قوم ایک حاکم تسلیم کرنے میں ہمیں کیا امر مانع ہوتا ہے ؟
بطور قوم ہم نے کتنا سفر طے کیا ہے۔۔۔ کیا چائنہ نے انقلاب کے بعد بھی اتنا ہی سفر طے نہیں کیا ؟
کیا بھارت نے بھی آزادی کے بعداتنا ہی سفر طے نہیں کیا ؟
بنگلہ دیش کی آزادی تو ابھی کل کی بات ہے۔۔ کیا انکی تعلیم و ترقی کی رفتار ہم سے کہیں زیادہ نہیں ؟
یورپ میں جرمنی ، آسٹریا ، سمیت متعدد ممالک عالمی جنگ کے بعد ہم سے بھی بعد میں تعمیرِ نو کے مرحلے میں داخل ہوئے۔۔۔ کیا انکی حالت بھی ایسی ہی ہے ؟
اور کتنی مثالیں دوں یہ ثابت کرنے کے لیے کہ موجودہ نظام ۔۔۔ چند ہزار کرپٹ اشرافیہ کا بنایا ہوا جال ہے۔۔ ایسا جال جس کے ذریعے وہی اشرافیہ ، انہی کے مامے چاچے، انہی کی قبیل کے لوگ 19-20 کے فرق سے اقتدار میں پہنچتے ہیں۔ ٹائٹل کوئی بھی ہو۔ جماعت کوئی بھی ہو۔ لیڈر کوئی بھی ہو ۔۔۔۔ ایوانان اقتدار میں کم و بیش وہی کرپٹ خاندان بیٹھے نظر آتے ہیں۔
عمران خان کی مثال خوب ہے۔۔۔۔ کیا عمران خان نے بھی اکثریتی الیکشن ٹکٹ انہی خاندانوں کے نمائندگان کو نہیں دیے؟ چند ایک حلقوں کو چھوڑ کر۔۔ بتائیے کہاں سے متوسط طبقہ کی قیادت سامنے آئی؟ کیا ہر حلقہ میں تحریک انصاف کو بھی کروڑوں روپے نہیں لگانے پڑے ؟؟؟؟
اور پھر آپ نے خود ہی اپنے جواب میں یہ بھی بتا دیا کہ ۔۔ موجودہ نظام کے نمائندگان کے ذریعے اگر آپ حکومت بھی بنا لین تو یہ کرپٹ نظام اسکے کرپٹ نمائندگان اور آلہ کار آپ کو چاہتے ہوئے بھی کوئی مثالی کارکردگی نہیں دکھانے دیں گے۔ ۔۔۔ وزیراعلی ہاوس کو لائبریری بنانے کے اعلان سے لے کر کرپشن کو جڑ سے اکھاڑ پھینکنے کے دعوے کہاں گئے ؟
یہی موقف ہمارا بھی ہے۔۔۔ کہ جب تک کرپٹ نظام بنیادوں سے تبدیل نہیں ہوتا ۔۔۔ کڑا احتساب کرکے لوٹ مار کرنے والوں کو قانون کے مطابق سزا دے کر نشانہ عبرت نہیں بنا دیا جاتااور انکی لوٹی ہوئی دولت کو واپس قومی خزانے کے ذریعے عوام کو منتقل نہیں کردی جاتی ۔
جب تک اختیارات ، وسائل منصفانہ طور پر ہر شہر قصبہ تک نہیں پہنچ جاتے ۔۔ اس وقت تک کچھ بھی تبدیل نہیں ہوگا۔
الیکشن کا نظام جب تک شفاف اور سستا نہ ہوجائے۔۔ دھن دھونس دھاندلی کا مکمل طور پر صفایا نہ ہوجائے۔۔۔ اور الیکشن میں ووٹ خریدنا باقاعدہ قابل سزا جرم نہ بن جائے ۔۔ قوم کو ووٹ کی اہمیت کا شعور دے کر اسکے قیمے کے نان، بریانی پلیٹ، بیٹے کی نوکری۔ بچے کے سکول داخلہ ، گلی کی پکی نالیاں یا بجلی کے کھمبوں کی رشوت اور برادری ازم کے نام پر ووٹ دہندگی کا حلقہ جاتی نظام جڑ سے اکھاڑ کر پھینک نہ دیا جائے۔۔۔ اس وقت تک کبھی ووٹ کے ذریعے قوم کا مقدر نہیں بدل سکتا ۔
کیونکہ موجودہ نظام انتخابات اور سیاسی کلچر دراصل 20-25 ہزار کرپٹ افراد کا کئی دہائیوں کی محنت سے بنایا ہوا ایک کرپٹ جال ہے جس کو جمہوریت کا لیبل دے کر کروڑوں غریب عوام کو انکے بنیادی حقوق سے محروم رکھ کر اپنے مفادات کا تحفظ کیا گیا ہے۔ ۔۔۔ یہ کرپٹ اشرافیہ کی بنائی ہوئی وکٹ ہے۔۔۔ جس پر جو بھی ایماندار، دیانتدار، لائق اور متوسط طبقے کے محب وطن کھیلنے جائے گا۔ شکست کھا کر آئے گا۔ کیونکہ ایمپائرنگ بھی اشرافیہ کی مرضی سے ہوتی ہے۔ ۔۔ غریب عوام کو 5 سال بعد ایک ووٹ کا ٹکٹ دے کر تماشا دیکھنے کے لیے سٹیڈیم میں بٹھا دیا جاتا ہے۔ ۔۔۔
ایک نئی منصفانہ وکٹ بنانے کی ضرورت ہے۔ غیر جانبدار اور ایماندار ایمپائرنگ کی ضرورت ہے۔ اور اس مطالبے میں عوام کا سٹیڈیم میں تماشائی بنا رہنا کافی نہیں۔۔ بلکہ ایک بھاری اکثریت کا ساتھ دینا کافی ہے۔
رستہ دکھانے والوں نے رستہ دکھا دیا ۔
اب قوم پر منحصر ہے۔ کہ کوفی بن کر ظالموں ، جاگیرداروں ، وڈیروں اور شاہانہ مزاج سیاستدانوں کے ظلم پر خاموش بیٹھی رہے۔ یا صحیح سمت رہنمائی کرنے والوں کے ہاتھ مضبوط کرے۔

 

یہ کرپٹ نظام وہ سڑک ہے جو ملک و قوم کے لیے ترقی، فلاح ، خوشحالی کے رستے کی طرف جاتی ہی نہیں۔ بلکہ گذشتہ کئی دہائیوں نے ثابت کردیا ہے کہ یہ تنزلی، ذلت، غربت او ر مایوسی کی طرف لے جانے والی سڑک ہے۔
ہم بطور انسان ۔عام زندگی میں۔ اگر کسی ایسے رستے پر چند قدم چلیں تو شعور ملتے ہی فوری طور پر راہ بدلنے کی کوشش کرتے ہیں۔ ۔۔ لیکن ۔۔ ہم عقل و شعور کی کس منزل پر ہیں کہ 65 سال سے دن بدن ہر قدم تنزلی کی طرف اٹھا رہے ہیں۔ پھر بھی مطمئن ہیں کہ ترقی اسی رستے سے ملے گی۔۔۔۔ جبکہ حمزہ شریف، بلاول زرداری وغیرہم اگلے حکمران بننے کی تیاریاں بھی کررہے ہیں۔ اور ہم اپنی اگلی نسل کو انکی غلامی میں دینے کو تیار بیٹھے ہیں۔
سڑک بدلنا ہوگی۔۔ نظام بدلنا ہوگا۔۔۔ اسکے لیے کرپٹ اشرافیہ کے بنائے ہوئے جال میں پھنس کر کبھی نظام نہیں بدلا جائے گا۔۔۔ اس جال کو توڑ نا ہوگا۔۔ اس سازش کو چاک کرنا ہوگا۔
ورنہ ہم طاہرالقادری، عبدالستار ایدھی، ڈاکٹر عبدالقدیر کی یاد میں سیمینار کرنے والے تو بنے رہیں گے۔ کبھی ان سے استفادہ نہ کرسکیں گے۔

 

ہمیں ایک قصائی کی دکان سے گوشت ۔۔ ایک بار ۔۔ اچھا نہ ملے تو دوبارہ اسکے پاس نہیں جائیں گے۔
کسی بھی دکان سے اسکی پراڈکٹ اچھی نہ ملے تو دوبارہ ادھر نہیں جائیں گے۔۔۔۔ تبدیلی کا سوچیں گے۔۔
لیکن جب ملک و ملت کا معاملہ آتا ہے ۔ ہماری بقا کا مسئلہ درپیش ہو تو ہم سب اصول بھول کر کبوتر کی طرح ریت میں آنکھیں داب لیتے ہیں۔

 

مجھے آپ کے اس جملے پر بھی حیرت ہوئی کہ ۔۔۔ پولیس اپنے فرائض کی ادائیگی میں جان دے رہی ہے ۔۔۔۔
17 جون کو ماڈل ٹاون میں 100 افراد کے سینے ، گردن اور سر میں گولیاں مارنا ۔۔ کونسے فرض کی ادائیگی تھی ـ
یاد رکھ لیں۔۔ پولیس کسی حکمران کی ذاتی ملازم نہیں ہوتی ۔۔ بلکہ عوام کی ملازم ہوتی ہے۔۔ عوام کے ٹیکس سے اسکی تنخواہ بنتی ہے۔
ملک عوام کا ہوتا ہے۔۔ خزانہ عوام کا ہوتا ہے۔۔۔ ملکی آمدن عوام کی ہوتی ہے۔۔۔ اوروزیراعظم سے لے کر وزیراعلی اور عام پولیس مین تک ہر کوئی اس عوام کا ملازم اور نوکر ہوتا ہے۔
پولیس کی ٹریننگ مکمل ہونے پر جو حلف نامہ ہوتا ہے۔۔۔ ذرا اسکے الفاظ یہاں نقل فرما دیں۔ جس میں لکھا ہو کہ پولیس حکمرانوں کی ذاتی ملازم ہوتی ہے۔
ہرگز نہیں بلکہ پولیس ریاست کی ملازم ۔۔ اور عوام کے جان و ملا کی حفاظت کرنے کی ذمہ دار ہوتی ہے۔
بھٹو تو ایک قتل سے نہیں بچ سکا تھا۔۔ یہاں تو 14 قتل 17جون کے ۔۔ اور آجکل یوم شہدا کے قافلوں سے بھی نصف درجن شہادتیں ہوچکی ہیں۔ یہ سارے قتل انشاءاللہ حکمرانوں کے گلے کا پھندہ بنیں گے۔
سیدنا فاروق اعظم کے قانون کے مطابق دجلہ کے کنارے بکری کے بچے کی جان کی ذمہ داری بھی حکمران پر بنتی ہے۔ قرآن بھی قصاص کا حکم دیتا ہے۔
۔۔۔۔
پولیس شریف فیملی کے ذاتی غنڈوں کا کردار ادا کر رہی ہے۔۔۔ خدا کے لیے اسے ۔۔ فرض کی ادائیگی ۔۔۔ کا نام دے کر شہیدوں کے خون سے زیادتی نہ کریں۔

 

گویا سیاست کرنا ہوتو پھر بنکوں سے اربوں لوٹنے چاہیں ؟
کرپشن کرکے پہلے اربوں پتی بناجائے ؟
یا بھٹو خاندان جیسے کسی خاندان میں پیدا ہوا جائے ؟
مدرسوں ، سکولوں ، یونیورسٹیوں کے طالبعلموں کو دہشتگردی کی ٹریننگ دے کر دہشت قائم کی جائے ؟
نعرے ایمانداری کے لگائے جائیں۔ مگر ٹکٹ حلقے کے غنڈے بدمعاش رسہ گیر کو دے کر اسمبلی کی سیٹیں جیتی جائیں ؟

سبحان اللہ ۔۔ سبحان اللہ۔۔ سبحان اللہ

 

کیا اسلام ۔۔ امر بالمعروف اور نہی عن المنکر کا حکم نہیں دیتا ؟
گویا ۔۔ قصائی غلط بیچتا ہے تو بیچتا جائے۔۔ لوگ کھا کھاکر مرتے ہیں تو مرتے رہیں۔ اسے کچھ نہ کہا جائے۔۔ اسے شاباشی دی جائے ۔۔ معاشرے میں لوگ ، ادارے، سمگلنگ کرتے جائیں۔ چوری ڈکیتی کرتے جائیں۔ حکومتی سرپرستی میں لوٹ مار کا بازار گرم رہے۔۔ اسلام تو ایسی خود غرضی نہیں سکھاتا
معاف کیجئے گا۔۔ یہ نہ تو اسلامی سوچ ہے نہ ہی انسانی ہمدردی کے کسی پیمانے سے justifiable ہے ۔۔۔

 

خون بہا کون رہا ہے ؟؟؟
حیرت ہے کہ خون بہانے والے کے خلاف تو ہمیں لفظ نہیں مل رہے۔۔۔
یہ مثال ایسی ہے جیسے کسی کے گھر میں کوئی ڈاکو گھس کر لوٹ مار شروع کردے ۔خون خرابہ شروع کردے۔ اور گھر والے چیخیں چلائیں۔
اور ایسی سوچ والے منصفین گھر والوں کو ہی دوشی قرار دیتے ہوئے فرما دیں ۔۔ کہ تم نے گھر میں سامان رکھا ہی کیوں تھا کہ ڈاکو آئیں۔ تم نے جان سنبھالی ہی کیوں تھی کہ ڈاکو خون بہائیں۔
مطلب ڈاکو، قاتل ، ظالم کی مذمت کی بجائے ۔۔ مظلوم، مجبور ، غریبوں پر ہی طعنہ زنی کردی جائے۔
اگر معیار اور پیمانہ یہی ہے۔ تو پھر حق کی خاطر لڑنے والے تاریخ کے سبھی شہیدوں کو اسی پیمانے پر دوشی قرار دینا ہوگا۔
کربلا کے میدان پر بھی معاذاللہ یہی تبصرہ کرنا ہوگا
تاریخ پاکستان میں ہجرت کے وقت کی قربانیوں پر بھی یہی اصول لاگو کرنا ہوگا۔ کیونکہ قائداعظم خود تو کیڈلاک میں گھومتے اور ہوائی جہازوں میں سفر کرتے تھے۔ لیکن عوام کو''اکسا'' کر نئی مملکت کی خواب دکھایا اور پھرہزاروں معصوم بہنوں، بچوں اور انسانوں کی جان و مال کی قربانیاں دینا پڑیں۔
خون خرابہ تو پھر ہردور میں ہوا ہے جناب ۔۔ ہر لیڈر کو الزام دیں۔
یہ نہ کریں کہ جو گذر گیا وہ کتابوں میں بطور ہیرو۔۔ اور جو سامنے ہے وہ مجرم !!!!

 

اگر آپ 17 جون کو منہاج القرآن پر حملہ اور پولیس کی ڈائریکٹ فائرنگ سے 14 جانوں کے ضیاع اور 90 شدید زخمیوں کو دہشت گرد اور پولیس کو " فرض شناسی " کا خطاب دینے پر مصر ہیں تو آپ کی سوچ آپ کو مبارک !!!
معافی چاہتا ہوں مگر پولیس کا فرض بہرحال عوام کی حفاظت ہے اور مجرموں کی گرفتاری ہے۔ اگر انتہائی سنگین حالت ہوجائے تو وارننگ دے کر نچلے حصے میں گولی مارنے کا آرڈر ہے۔ لیکن یہاں نہتے عوام کی جانب سے ایک بھی گولی نہ چلی نہ رائفل بندوق نظر آئی۔ لیکن آپ کا اصرار ہے تو آپ کو مبارک !

 

عوامی تحریک نے کب خون بہایا ؟
خدا کے لیے اپنی تحقیق کا دائرہ کار غیرجانبداری سے وسیع کریں۔ محض داڑھی دیکھ کر دہشت گرد طالبان خوارج اور اہلِ حق اور اہلِ امن کو ایک صف میں کھڑا نہ کریں۔
عوامی تحریک نے کیا کیا ۔۔ کبھی وقت ملے تو www.minhajwelfare.org کو ایک دفعہ کھنگال لیں۔ بلکہ آپ تو خود گواہ ہیں کہ کئی دورافتادہ علاقوں میں تعلیم کو عام کرنے کے لیے منہاج کے سکول چل رہے ہیں۔