معراجِ حُضور ﷺ (۱۳۲۸ھ)، کلام الامام و امام الکلام بمعہ تضمین

59
حواس اپنے درست کرلو ، پڑے ہو چکر میں اس سے نکلو
بنو نہ اَحول سنبھل کے دیکھو ، یہ ہے حقیقت میں ایک یادو
مقامِ قوسین کو تو سوچو ، بغور اِس دائرے کو سمجھو

کمانِ اِمکاں کے جُھوٹے نُقطو! تُم اوّل آخِر کےپَھیر میں ہو​

مُحیط کی چال سے تو پُوچھو ، کدھر سے آئے کدھر گئے تھے​

 

60
اِدھر سے ہر بار التجائیں ، یہ کد کہ اُمت کو بخشوالیں
اُدھر سے لطف و کرم کی باتیں ، کہ جتنے چاہو ہم اُتنےبخشیں
اِدھر سے طاعت کی پیش نذریں ، اُدھر سے بخشش ، کرم ،عطائیں

ادھر سے تھیں نذرِ شہ نمازیں ، ادھر سے انعامِ خُسروی میں​

سلام و رحمت کے ہار گندھ کر ، گُلو‌ئےپُر نور میں پڑے تھے​

 

61
یہاں ہے مجبور عقلِ پُر فن ، نہ راہِ رفتن نہ روئے ماندن
کہاں ہوائے خیالِ روشن ، اُٹھا سکے اُس مکاں کی چلمن
سُنانے سننے کا جن پہ تھا ظنّ ، ابھی وہ تھے منتظر ہمہ تن

زبان کو انتظارِ گفتن ، تو گوش کو حسرتِ شُنیدَن​

یہاں جوکہنا تھا کہہ لیا تھے ، جو بات سُننی تھی سُن چکےتھے​

 

62
وہاں سے پایا جو کچھ اشارا ، اُدھر سےرُخصت ہوا وہ پیارا
خوشی سے کرتا چلا نظارا ، خدائی کا کارخانہ سارا
یہ عرض حوروں نے کی خدارا ، دمک دمک کیجے گھر ہمارا

وہ بُرجِ بطحا کا ماہ پارا ، بِہشت کی سیر کوسِدھارا​

چمک پہ تھا خُلد کا ستارا ، کہ اُس قمَر کے قَدَم گئےتھے​

 

63
جناں کی تقدیر خوب چمکی ، بڑھی تھی وہ جوششِ تجلی
کہ مشرقستاں بنی تھی ساری ، چمکتی تھی ایک ایک کیاری
وہ نور کی چاندنی تھی چھٹکی ، جو اس سے پہلے کبھی نہ دیکھی

سُرُورِ مقدَم کی روشنی تھی ، کہ تابِشوں سے مہِ عَرَب کی​

جِناں کے گلشن تھے جھاڑ فرشی ، جو پُھول تھے وہ کنوَل بنے تھے​

 

64
بہار کا حکم تھا دمکیے ، مرادِ شبنم ذرا چمکیے
نسیم کہتی تھی بس مہکیے، صبا کا ارشاد تھا لہکیے
یہ شورِ حسرت کہ اب سرَکیے ، وہ زورِ حیرت کہ منھ ہی تکیے

طَرَب کی نازِش کہ ہاں لچکیے ، اَدَب وہ بندش کہ ہِل نہ سکیے​

یہ جوشِ ضدَّین تھا کہ پودے ، کشاکشِ اَرّہ کے تلے تھے​

 

65
مدارجِ قرب سے بھی بڑھ کے ، خدا ہی جانے کہاں وہ پہنچے
ازل سے اُٹّھے نہ تھے جو پردے ، وہ جلوے حق کے کرم سےدیکھے
پلک بھی جب تک نہ کوئی مارے ، کہ یہ گئے بھی پلٹ بھی آئے

خُدا کی قُدرت کہ چاند حق کے ، کروڑوں منزل میں جلوه کرکے​

ابھی نہ تاروں کی چھاؤں بدلی ، کہ نُور کے تڑکے آلیے تھے​

 

66
اثرؔ نے کی جو ثنا و مدحت ، حضور دیکھیں بہ چشمِ رحمت
صلہ ملے دوجہاں کی دولت ، رہے نہ پھر اس کو کوئی حاجت
مِلا اُسے جس سے فیضِ خدمت، اُدھر بھی کوئی نگاہِ رافت

نبیِ رحمت شفیعِ اُمّت ، رضاؔ پہ للہ ہو عنایت​

اِسے بھی ان خِلعتوں سے حصّہ جو خاص رحمت کہ واں بٹے تھے​

 

67
یہاں نہ طاعت نہ زہد و تقویٰ ، یہی وسیلہ ہے مغفرت کا
کہ ہے ثنا گوئی اپنا شیوہ ، اِسی سبب سے لکھا یہ خمسہ
مراد ہے نعتِ شاہِ والا، غرض نہیں شاعری سے اصلا

ثنائے سرکار ہےوظیفہ ، قبولِ سرکار ہے تمنّا​

نہ شاعری کی ہوس نہ پروا ، روی تھی کیا کیسے قافیے تھے​

 

واقعہ معراج سے متعلق رئیس القلم علامہ ارشدالقادری کا مضمون یہاں ملاحظہ فرمائیے​

 

جزاک اللہ خیرا

 

آمین

 

آمین
نعیم بھائی اللہ آپ کو خوشیاں عطا فرمائے
بقول شخصے

عرش سے نور چلا، اور حرم تک پہنچا​

سلسلہ میرے گناہوں کا کرم تک پہنچا​

تیری معراج کہ تو جانے کہاں تک پہنچا​

میری معراج کے میں تیرے قدم تک پہنچا​