حسین خود نہیں بنتا۔۔ خدا بناتا ہے

اللھم صل وسلم علی سیدنا محمد وعلی آلہ واصحابہ وسلم

حسینیت اور یزیدیت کا تضاد

یزید نقشئہ جورو جفا بناتا ہے
حسین اس میں خط کربلا بناتا ہے

یزید موسم عصیاں کا لا علاج مرض
حسین خاک سے خاکِ شفا بناتا ہے

یزید کاخِ کثافت کی ڈولتی بنیاد
حسین حسن کی حیرت سرا بناتا ہے

یزد تیز ہواوں کی جوڑ توڑ میں گم
حسین سر پہ بہن کی ردا بناتا ہے

یزید لکھتا ہے تاریکیوں کو خط دن بھر
حسین شام سے پہلے دیا بناتا ہے

یزید آج بھی بنتے ہیں لوگ کوشش سے
حسین خود نہیں بنتا خدا بناتا ہے


اللھم صل وسلم علی سیدنا محمد وعلی آلہ واصحابہ وسلم​

 

بہت ہی اعلی قبلہ۔۔۔۔۔۔۔۔۔۔۔۔۔۔۔۔۔۔
سلام یا حسین علیہ السلام

 

(حسرت موہانی)


امامِ برحقِ اہلِ رضا سلام علیک
شہیدِ معرکۂ کربلا سلام علیک

کلِ مرادِ ولایت حسین ابنِ علی
تتمۂ شرفِ مصطفٰی سلام علیک

ثبوت یہ ہے کہ نُورِ شہادتِ کُبرٰی
تری جبیں سے نمایاں ہوا، سلام علیک

عبث ہے اور کہیں راہِ صبر و حق کی تلاش
تری مثال ہے جب رہنما، سلام علیک

ترے طفیل مِیں، حسرت بھی ہو شہیدِ وفا
یہی دعا ہے، یہی مدّعا، سلام علیک

 

السلام علیک یا سید الشہداء و یا سید الشباب اھل الجنۃ

 

(محمد علی جوہر)


بیتاب کر رہی ہے تمنّائے کربلا
یاد آ رہا ہے بادیہ پیمائے کربلا

ہے مقتلِ حسین میں اب تک وہی بہار
ہیں کس قدر شگفتہ یہ گلہائے کربلا

روزِ ازل سے ہے یہی اک مقصدِ حیات
جائے گا سر کے ساتھ، ہے سودائے کربلا

جو رازِ کیمیا ہے نہاں خاک میں اُسے
سمجھا ہے خوب ناصیہ فرسائے کربلا

مطلب فرات سے ہے نہ آبِ حیات سے
ہوں تشنۂ شہادت و شیدائے کربلا

جوہر مسیح و خضر کو ملتی نہیں یہ چیز
اور یوں نصیب سے تجھے مل جائے کربلا

 

میرا خدا جسے اوجِ کمال دیتا ہے
اسے بتولّ کی چوکھٹ پہ ڈال دیتا ہے
پرکھنا ہو جو کسی کو تو یا حسینّ کہو
یہ وہ نام ہے جو شجرے کھنگال دیتا ہے

پیر نصیرگولڑوی​

 

کربلا - انور شعور

مدینے کے مسافر جان دینے کربلا آئے
تمام آسائشیں تج کر بہ تسلیم و رضا آئے

نہیں ہوتا کوئی آسان راہِ عشق طے کرنا
سفر میں ہر قدم پر مرحلے صبر آزما آئے

بھلا ہر کس و ناکس کو بھی یہ توفیق ہوتی ہے؟
فدا ہونے کی خاطر آئے تو اہلِ وفا آئے

سما سکتی نہیں الفاظ میں مظلومیت ان کی
شہیدوں پر غم و رنج و الم بے انتہا آئے

ہمیں بھی کاش آ جائے یہ جینا اور یہ مرنا
تمنا اے شعور اس کے سوا ہونٹوں پہ کیا آئے

خدائی آج بھی ہے منتظر مشکل کشائی کی
کوئی مردِ خدا اس دور میں بھی اے خدا آئے

یزیدِ وقت نے دنیا جہنم میں بدل دی ہے
ضرورت ہے کہ پھر کوئی زعیمِ کربلا آئے