یا نبی نور ہو تم جلوۂ یزداں کی قسم

نعتیہ کلام

یا نبیﷺ نور ہو تم جلوۂ یزداں کی قسم
جیسے تم ہو نہیں ایسا کوئی ایماں کی قسم
مرتبہ حق سے کسی اور کو ایسا نہ ملا
تاجِ خسرو کی قسم، تختِ سلیماں کی قسم
دونوں عالم میں نہیں کوئی بھی تم جیسا حسیں
ماہِ تاباں کی قسم، مہرِ درخشاں کی قسم
یا محمدﷺ تیری صورت ہے خدا کی صورت
دین و ایماں کی قسم، آیتِ قرآں کی قسم
جس نے دیکھا میری سرکارﷺ کو دیوانہ ہوا
حسنِ یوسف کی قسم، جلوۂ جاناں کی قسم
آسمانوں سے بھی افضل ہے مدینے کی زمیں
عرشِ بریں کی قسم، جنتِ رضواں کی قسم
لوگ بنتے ہیں ولی ان کی غلامی سے فناؔ
غوثِ اعظم کی قسم، ہند کے سلطاں کی قسم

فنا نظامی کانپوری​