وفاکی جستجو زندہ نہ تجھ میں ہے ، نہ مجھ میں ہے ٭٭٭٭عائشہ بیگ عاشی

وفاکی جستجو زندہ نہ تجھ میں ہے ، نہ مجھ میں ہے
کوئی بھی آرزوزندہ نہ تجھ میں ہے، نہ مجھ میں ہے

محبت ، پیار، الفت، عشق سب ہی سر نہادہ ہیں
کوئی بھی سرخروزندہ نہ تجھ میں ہے ، نہ مجھ میں ہے

عجب سی سرد مہری، سرد خانی، سردجانی بھی
تعلق، کا لہو زندہ نہ تجھ میں ہے ،نہ مجھ میں ہے

وہی گلشن، وہی گل ہیں، وہی رنگت، وہی خوشبو
پہ حسنِ رنگ و بُوزندہ نہ تجھ میں ہے نہ مجھ میں ہے

ترا میرا ٹھہر جانے پہ پتھرانا ہی بنتا تھا
کہ اب خُوئے نمُوزندہ نہ تجھ میں ہے ،نہ مجھ میں ہے

محبت یُوں سرِدنیاتماشا بن گئی عاشی
کہ اسکی آبرو زندہ نہ تجھ میں ہے نہ مجھ میں ہے
~~~~~~~~~~~~
عائشہ بیگ عاشی​