مفلس زندگی اب نہ سمجھے کوئی۔۔۔۔۔

مفلس زندگی اب نہ سمجھے کوئی
مجھ کو عشق نبی اسقدر مل گیا
جگمگائے نہ کیوں میرا عکس دروں
ایک پتھر کو آئینہ گر مل گیا

رحمت دوجہاں ذات سرکار کی
اور میری حیثیت ایک پرکار سی
جانے عمر رواں لے کے جاتی کہاں
خیر سے مجھ کو خیر البشر مل گیا

جس کی رحمت سے تقدیر انساں کھلے
اس کی جانب ہی دروازہ جاں کھلے
جس کی اک رہ گذر طے نہ ہو عمر بھر
قبلہء آرزو تو مگر مل گیا

اس کا دیوانہ ہوں اس کا مجذوب ہوں
کیا یہ کم ہے کہ میں اس سے منسوب ہوں
سرحد حشر تک جاؤں گا بے دھڑک
مجھ کو اتنا تو زاد سفر مل گیا

ذہن بے رنگ تھا سانس بے روپ تھی
روح پر معصیت کی کڑی دھوپ تھی
اس کی چشم غنی رونق جاں بنی
چھاؤں جس کی گھنی وہ شجر مل گیا

جب سے مجھ پر ہوا مصطفےٰ کا کرم
بن گیا دل مظفر چراغ حرم
زندگی پھر رہی تھی بھٹکتی ہوئی
میری خانہ بدوشی کو گھر مل گیا​

 

باجی جی ۔ یہ بہت ہی خوبصورت نعت ہے۔ لیکن مجھے “اُس“ کی جگہ “اُن“ پڑھنا زیادہ اچھا اور معقول لگتا ہے کیونکہ اس سے حدِ ادب رہتی ہے اور شعر کے قافیہ ردیف اور وزن پر بھی کوئی فرق نہیں پڑتا

 

پوری کوشش کروں گی کہ آپ کا یہ پیغام “ مظفر وارثی صاحب“ تک پہنچ جائے وہسے کئی نعتیں ہیں جن میں حضور :saw: کے لیئے “تیرا“ ، “ اسکا“ ، “تمھارا“ اور اسی طرح کے کئی الفاظ استعمال کیئے گئے ہیں۔ میرے خیال میں اپنی اپنی محبت کی بات ہے۔ کچھ لوگ آپ کی بجائے تم کہنا زیادہ مناسب خیال کرتے ہیں کہ آپ کے صیغے سے کئی لوگوں کی طرف اشارہ جاتا ہے جبکہ تم کہنے سے بات واضح ہوتی ہے کہ ہم کس کی بات کر رہے ہیں۔ جیسا کہ میں نے پہلے کہا اپنی اپنی محبت ، عقیدت اور نیت کی بات ہے۔ اس میں بے ادبی کی کوئی بات نہیں۔

 

درست فرمایا۔ معاذ اللہ میں نے بھی “بے ادبی“ کا فتوی نہیں‌لگایا۔ نہ ہی میں ایسے لوگوں میں سے ہوں۔ لیکن اگر قافیہ، ردیف، وزن اور طرز میں فرق نہ پڑے تو بہت سے نعت گو شعراء صیغہءادب کا طرز تخاطب اپنانے کو ترجیح دیتے ہیں۔

بے شک بہت عظیم عاشقانِ رسول :saw: شعراء نے بھی “تیرا، تمھارا“ جیسے الفاظ استعمال کیے ہیں لیکن میرا ذاتی خیال ہے کہ جہاں شعر کا تقاضا فقط ایسے ہی الفاظ ہوں وہاں “ تو “‌تیرا“ وغیرہ استعمال کر لینے میں کوئی حرج نہیں لیکن جہاں‌ممکن ہو وہاں “آپ ، ان، “ کے الفاظ سے تقاضائے ادب ترجیحاً پورا ہوتا ہے۔

 

مجھے اس شعر میں لفظِ اس سے جتنی اپنائیت ، وارفتگی، والہانہ انداز نظر آتا ہے۔۔ وہ ان پڑھنے سے نہیں آتا۔۔ اپنی اپنی کیفیات کی بات ہیں۔۔