فیض احمد فیض کی شاعری

سبھی کچھ ہے تیرا دیا ہوا، سبھی راحتیں، سبھی کلفتیں
کبھی صحبتیں، کبھی فرقتیں، کبھی دوریاں، کبھی قربتیں
یہ سخن جو ہم نے رقم کئے، یہ ہیں سب ورق تری یاد کے
کوئی لمحہ صبحِ وصال کا، کئی شام ہجر کی مدتیں
جو تمہاری مان لیں ناصحا، تو رہے گا دامنِ دل میں کیا
نہ کسی عدو کی عداوتیں، نہ کسی صنم کی مروتیں
چلو آؤ تم کو دکھائیں ہم، جو بچا ہے مقتلِ شہر میں
یہ مزار اہلِ صفا کے ہیں، یہ ہیں اہلِ صدق کی تربتیں
مری جان آج کا غم نہ کر، کہ نہ جانے کاتبِ وقت نے
کسی اپنے کل میں بھی بھول کر، کہیں لکھ رکھی ہوں مسرتیں
(فیض احمد فیض)
​

 

کب ٹھہرے گا درد اے دل، کب رات بسر ہوگی
سنتے تھے وہ آئیں گے، سنتے تھے سحر ہوگی
(فیض احمد فیض)
​

 

نہ گنواؤ ناوکِ نیم کش، دلِ ریزہ ریزہ گنوادیا

جو بچے ہیں سنگ سمیٹ لو، تنِ داغ داغ لٹادیا

مرے چارہ گر کو نوید ہو، صفِ دشمناں کو خبر کرو

وہ جو قرض رکھتے تھے جان پر، وہ حساب آج چکادیا

کرو کج جبیں پہ سرِ کفن، مرے قاتلوں کو گماں نہ ہو

کہ غرورِ عشق کا بانکپن، پسِ مرگ ہم نے بھلادیا

اُدھر ایک حرف کے کشتنی، یہاں لاکھ عذر تھا گفتنی

جو کہا تو ہنس کے اڑادیا، جو لکھا تو پڑھ کے مٹادیا

جو رکے تو کوہِ گراں تھے ہم، جو چلے تو جاں سے گزر گئے

رہِ یار ہم نے قدم قدم تجھے یادگار بنادیا

(فیض احمد فیض)

​

 

یہ جفائے غم کا چارہ ، وہ نِجات دل کا عالم
تیرا حُسن دستِ عیسٰیؑ ، تیری یاد رُوئے مریمؑ

دل و جاں فدائے راھے کبھی آ کے دیکھ ھمدم
سرِ کُوئے دل فِگاراں شبِ آرزو کا عالم

تیری دِید سے سوا ھے ، تیرے شوق میں بہاراں
وہ چمن جہاں گِری ھے تیرے گیسوؤں کی شبنم

یہ عجب قیامتیں ھیں تیری رھگُزر میں گُزراں
نہ ھُوا کہ مَر مِٹے ھم ، نہ ھُوا کہ جی اُٹھے ھم

لو سُنی گئی ھماری ، یُوں پِھرے ھیں دن کہ پِھر سے
وھی گوشۂ قفس ھے ، وھی فصلِ گُل کا ماتم

"فیض احمد فیضؔ"

 

مجھ سے پہلی سی محبت مری محبوب نہ مانگ

میں نے سمجھاتھاکہ توہے درخشاں ہے حیات

تیرا غم ہے تو غمِ دہر کا جھگڑا کیا ہے

تیری صورت سے ہے عالم میں بہاروں کو ثبات

تیری آنکھوں کے سوادنیا میں رکھا کیا ہے؟

تو جو مل جائے تو تقدیر نِگُوں ہو جائے

یوں نہ تھا،میں نے فقط چاہا تھا۔ یُوں ہو جائے

اور بھی دُکھ ہیں زمانے میں محبت سے سوا

راحتیں اور بھی وصل کی راحت کے سوا

ان گنت صدیوں کے تاریک بہیمانہ طلسم

ریشم و اطلس و کمخواب میں بُنوائے ہوئے

جا بجا بکتے ہوئے کوچہ و بازار میں جسم

خاک میں لتھڑے ہوئے خون میں نہلائے ہوئے

جسم نکلے ہوئے امراض کے تنّوروں سے

پیپ بہتی ہوئی گلتے ہوئے ناسوروں سے

لوٹ جاتی ہے ادھر کو بھی نظر کیا کیجئے

اب بھی دلکش ہے ترا حسن،مگر کیا کیجئے

اور بھی دکھ ہیں زمانے میں محبت کے سوا

راحتیں اور بھی ہیں وصل کی راحت کے سوا

مجھ سے پہلی سی محبت مری محبوب نہ مانگ

 

یہ فیض کے ہاتھ کی تحریر ہے؟

 

مجھے نہیں لگتی