جو میں سوئے طیبہ چلوں کبھی تو سفر میں ایسا کمال ہو

نعت سرور عالمﷺ

جو میں سُوۓ طیبہ چلوں کبھی تو سفر میں ایسا کمال ہو
نہ ستائیں راہ کے پیچ و خم، نہ بدن تھکن سے نڈھال ہو
مری خاک خشت میں ڈھال کر اسے چن دو روضۂ پاک میں
نہ ہی فاصلوں کا گلہ رہے، نہ جدائیوں کا ملال ہو
ترا عشق میرا خزانہ ہے، ترا ذکر مری کمائی ہے
میں وہ دن نہ دیکھوں خدا کرے کہ مری طلب زر و مال ہو
سر خواب مجھ سے کہا گیا کہ یہ راز سب پہ عیاں کروں
جو نماز ہو تو حسین سی، ہو اذان تو مثلِ بلال ہو
سرِ عرش پَل میں پہنچ گیا، تری رفعتوں کی نظیر کیا
کوئی لاۓ تیرے جواب میں جو کسی کے پاس مثال ہو
جو دوامِ حرف کی بات کی تو نداۓ غیب سنائی دی
تجھے وہ عروج عطا ہوا جسے حشر تک نہ زوال ہو

سید انصر​

 

سبحان اللہ ۔۔ آمین