بِکھر کے ٹُوٹنے والے صدا نہیں کرتے ---- شہنازؔ مزمل

بِکھر کے ٹُوٹنے والے صدا نہیں کرتے
کوئی بھی کام خلافِ اَنا نہیں کرتے
شجر پہ بیٹھے ہوئے پنچھیوں سے بات کرو
فضا میں اُڑتے پرندے سُنا نہیں کرتے
گُہر شناس ہیں طُوفاں کے ساتھ رہتے ہیں
سمندروں سے عداوت کِیا نہیں کرتے
بڑی خموشی سے آ کر زمیں پہ گِرتے ہیں
فلک سے ٹُوٹتے تارے صدا نہیں کرتے
بس ایک بار ہی قسمت ہم آزماتے ہیں
پھر اس کے بعد کسی سے گِلہ نہیں کرتے
بُجھا دِیئے ہیں سرِشام آرزو کے چراغ
ہوا کے رُخ پہ دِیئے تو جلا نہیں کرتے

شہنازؔ مزمل​