آیا نہ ہوگا اسطرح رنگ و شباب ریت پر

آیا نہ ہوگا اسطرح حُسن و شباب ریت پر
گُلشنِ فاطمہ کے تھے سارے گلاب ریت پر

آلِ بتول کے سوا کوئی نہیں کِھلا سکا
قطرہء آب کے بغیر اتنے گلاب ریت پر

عِشق میں کیا لُٹائیے عِشق میں کیا بچائیے
آلِ نبی نے لکھ دیا سارا نصاب ریت پر

جتنے سوال عشق نے آلِ رسول سے کیے
ایک کے بعد اک دیے سارے جواب ریت پر

پیاسا حسین کو کہوں اتنا تو بے ادب نہیں
لمسِ لبِ حسین کو ترسا تھا آب ریت پر

آلِ نبی کا کام تھا آلِ نبی ہی کر گئے
کوئی نہ لکھ سکا ادیب ایسی کتاب ریت پر

کلام: حضرت ادیب رائے پوری