کرم ہے آلِ نبی کا کہ میں حسینی ہوں (ہدیہ عقیدت)

بحمداللہ تعالیٰ وبتوفیقہ محرم الحرام کی نسبت سے آج صبح اھلبیتِ اطہار علیھم السلام کی بارگاہ میں ہدیہ و نذرانہ کے طور پر کچھ گلہائےعقیدت ترتیب پاگئے۔ تمام محبانِ اہلبیت پاک کے پیشِ نذر ہیں۔


اللھم صل علیٰ سیدنا ومولانا محمد وعلیٰ آلہ واھل بیتہ وصحبہ وبارک وسلم

کرم ہے آل نبی کا کہ میں حسینی ہوں
میرا ایمان ہے پختہ کہ میں حسینی ہوں

وہی خدا کا ہے بندہ ، وہی غلامِ نبی
ہے جس نے دل سے یہ مانا کہ میں حسینی ہوں

فقیر جب سے بنا ہوں درِبتول کا میں
ہوں بادشاہوں سے اچھا، کہ میں حسینی ہوں

غموں کی دھوپ نہ آئے گی جو ہے مرے سرپہ
علی کے نعل کا سایہ ، کہ میں حسینی ہوں

میں ہوں غلام در غلام در غلامِ علی
ہے میرا نسب پاکیزہ کہ میں حسینی ہوں

خدایا نسل کو میری بھی دے ایماں ایسا
ہواِن کے لب پہ بھی نعرہ کہ میں حسینی ہوں

قبر میں تم سے نکیروں نے گر سوال کیا
تو تم جواب میں کہنا کہ میں حسینی ہوں

میدانِ حشر میں پیاسا بھلا رہوں کیونکر
ملے گاحوض سےپیالہ کہ میں حسینی ہوں

سبق یہ سیکھا ہے کربل سے، ظلم کے آگے
کبھی نہ سرکوجھکایا کہ میں حسینی ہوں

نبی کے دین کی خاطر ہے میری جاں حاضر
ہے یہ وفا کا تقاضا کہ میں حسینی ہوں

یزیدِ وقت سے کہہ دو سجائے پھر کربل
رضا کا سرہےبسجدہ کہ میں حسینی ہوں

کلام : محمد نعیم رضا قادری۔ ویانا۔ آسٹریا۔20اکتوبر2015

الکرم ملک بلال ھارون رشید

 

بہت خوب۔ سبحان اللہ