تو بنا کے پھر سے بگاڑ دے ، مجھے چاک سے نہ اُتارنا

تو بنا کے پھر سے بگاڑ دے ، مجھے چاک سے نہ اُتارنا
رہوں کو زہ گر ترے سامنے، مجھے چاک سے نہ اُتارنا

تری ”چوبِ چاک “ کی گردشیں مرے آب وگِل میں اُتر گئیں
مرے پاﺅں ڈوری سے کاٹ کے مجھے چاک سے نہ اُتارنا

تری اُنگلیاں مرے جسم میں یونہی لمس بن کے گڑی رہیں
کفِ کوزہ گر مری مان لے مجھے چاک سے نہ اُتارنا

مجھے رکتا دیکھ کے کرب میں کہیں وہ بھی رقص نہ چھوڑ دے
کسی گردباد کے سامنے، مجھے چاک سے نہ اُتارنا

ترا زعم فن بھی عزیز ہے، بڑے شوق سے تُو سنوار لے
مرے پیچ و خم ، مرے زاویے ، مجھے چاک سے نہ اُتارنا

ترے ’ ’ سنگِ چاک“ پہ نرم ہے مری خاک ِ نم، اِسے چھوتا رہ
کسی ایک شکل میں ڈھال کے مجھے چاک سے نہ اُتارنا

مجھے گوندھنے میں جو گُم ہوئے ترے ہاتھ، اِن کا بدل کہاں
کبھی دستِ غیر کے واسطے مجھے چاک سے نہ اتارنا

ترا گیلا ہاتھ جو ہٹ گیا مرے بھیگے بھیگے وجود سے
مجھے ڈھانپ لینا ہے آگ نے، مجھے چاک سے نہ اتارنا
شہزاد نیر

 

بہت عمدہ۔۔۔۔ لاجواب

 

ترا گیلا ہاتھ جو ہٹ گیا مرے بھیگے بھیگے وجود سے
مجھے ڈھانپ لینا ہے آگ نے، مجھے چاک سے نہ اتارنا
ڈھانپ لینا ؟ یہ بات سمجھ میں نہیں آئی - اگر یہ غلطی ہے تو شدید ہے - کوئی اور بات ہے تو نہیں جانتا

 

ادب دوست بھائی ۔ یہ تو آسان سی بات تھی ۔ پوری غزل میں ایک تسلسل ہے اور اس آخری شعر میں شاعر نے بہت خوبصورتی سے اس کا اختتام کیا ہے ۔ جب تخلیق کار کا ہاتھ اپنے شاہکار سے ہٹ گیا تو مٹی کے شاہکار کی اگلی منزل آگ سے تپتی بھٹی ہے، مٹی کا شاہکار اس بات سے آگاہ ہے ۔ کچھ آگ کا ڈر اور کچھ اپنے تخلیق کار کے ہاتھوں کے لمس سے جدائی کا غم ۔۔۔۔۔۔۔۔۔۔۔ شاہکار کا کہنا بجا ہے کہ تیرا گیلا ہاتھ ہٹ گیا جو اس کے بھیگے وجود سے تو پھر آگ نے ہی اس کو گھیرنا ہے تاکہ وہ پک جائے ۔ یہ ایک خوبصورت استعارہ ہے ۔ کچھ لوگ سفر کے اتنے شوقین اور رسیا ہوتے ہیں کہ انہیں منزل کے پانے کی خوشی نہیں ہوتی ۔

 

پڑھنے سے تو زبردست لگ رہی ہے مگر اس کی اردو بہت مشکل ہے۔۔

 

شکریہ عمر خیام بھائی، میرا اشارہ "ڈھانپ لینا" محاورے کی طرف تھا

 

بہت اچھی غزل ہے ۔
داد قبول ہو ۔۔ واہ