جدائی بانٹنے کو آدمیت جاگ جاتی ہے

~~ غزل ~~
تمہاری یاد جاگے تو اذیت جاگ جاتی ہے
سحَر تک رَت جگے کی بربریت جاگ جاتی ہے

اذانِ ہجر گُونجے گُنبدِ دل، گنبدِ جاں میں
نمازِ وصل ادا کرنے کی نیت جاگ جاتی ہے

کہیں بھی شیریں و فرہاد کا کیسے ملن ہوتا
ہمیشہ ہی روایت کی وصیت جاگ جاتی ہے

محبت کی اذاں سن کر کبھی انساں نہیں جاگا
جدائی بانٹنے کو آدمیت جاگ جاتی ہے

اگرہو مرد سے لغزش ، تو کچھ ہوتا نہیں عاشی
خطا عورت سے ہو ! غیرت حمیت جاگ جاتی ہے
~~~~~~~~~~~~
عائشہ بیگ عاشی
~~~~~~~~~~~~

 

عائشہ بیگ
جدید لہجے کی غزل ہے - موضوع اچھے لگے مجھے
داد قبول کیجیے-

 

محبت کی اذاں سن کر کبھی انساں نہیں جاگا
جدائی بانٹنے کو آدمیت جاگ جاتی ہے

واہ، بہت خوب غزل ہے۔