سکواش کے نامور کھلاڑی ہاشم خان چل بسے

ہاشم خان 90 برس کی عمر تک سکواش کھیلتے رہے

سکواش کے کھیل میں دنیا میں پاکستان کا نام روشن کرنے والے پاکستانی کھلاڑی ہاشم خان امریکہ میں انتقال کر گئے ہیں۔
ہاشم خان نے بیٹے محمد نے خبر رساں ادارے ایسوسی ایٹڈ پریس سے بات کرتے ہوئے بتایا کہ ان کا انتقال پیر کی شب حرکتِ قلب بند ہو جانے سے ہوا۔
ان کی عمر 100 برس کے لگ بھگ تھی۔
پشاور کے نواحی علاقے نواں کلی میں پیدا ہونے والے ہاشم خان سکواش کی دنیا کا اہم مقابلہ برٹش اوپن جیتنے والے پہلے پاکستانی تھے۔
انھوں نے اپنے کیریئر میں 1951 سے 1958 تک سات مرتبہ یہ ٹورنامنٹ جیتا اور ایک مرتبہ انھیں فائنل میں شکست ہوئی۔
جب ہاشم خان نے پہلی مرتبہ برٹش اوپن جیتا تو ان کی عمر 37 برس تھی۔
ایسوسی ایٹڈ پریس کے مطابق 1960 کی دہائی میں ہاشم خان اپنے اہلِ خانہ کے ہمراہ امریکی ریاست کولوراڈو منتقل ہوگئے تھے جہاں انھوں نے سکواش کی کوچنگ شروع کر دی تھی۔
بعدازاں انھوں نے امریکہ میں ہی پروفیشنل سکواش بھی کھیلی اور 90 برس کی عمر تک مقابلوں میں حصہ لیتے رہے۔
ہاشم خان کے چھوٹے بھائی اعظم خان بھی سکواش کے سابق عالمی چیمپیئن رہ چکے ہیں۔
اپنے زمانۂ عروج میں اکثر و بیشتر یہ دونوں بھائی ہی عالمی مقابلوں کے فائنلز میں مدِمقابل ہوا کرتے تھے جسے برطانوی میڈیا نے ’سکواش فیملی افیئر‘ کا نام دیا تھا۔
http://www.bbc.co.uk/urdu/sport/2014/08/140819_hashim_khan_squash_death_zs.shtml

 

پاکستان کی پہچان ہاشم خان۔سو فی صد درست جناب