پاکستان کرکٹ ٹیم 9 ویں نمبر پر آگئی

پاکستان کی کرکٹ ٹیم آئی سی سی کی نئی عالمی رینکنگ میں ایک درجہ تنزلی کرتے ہوئے 9 ویں نمبر پر آ گئی ہے ۔
سب سے پریشان کن بات یہ ہے کہ اگر پاکستانی ٹیم کی ون ڈے کی کارکردگی میں بہتری نہ آئی تو وہ سنہ 2019 میں انگلینڈ میں ہونے والے ورلڈ کپ میں براہ راست شرکت سے بھی محروم ہوسکتی ہے اور کوالیفائنگ راؤنڈ کی تلوار اس کے سر پر لٹکی رہے گی ۔
آئی سی سی نے سنہ 2019 کے ورلڈ کپ میں براہ راست شرکت کے لیے جو آخری تاریخ مقرر کی ہے وہ 23 ستمبر سنہ 2017 ہے ۔
اس تاریخ تک میزبان انگلینڈ اور آئی سی سی کی عالمی رینکنگ کی اگلی سات ٹیمیں عالمی کپ میں براہ راست شرکت کی اہل ہوں گی ۔
ان 8 ٹیموں کے بعد نچلی رینکنگ کی 4 ٹیموں کو آئی سی سی ورلڈ کرکٹ لیگ کی ٹاپ ٹیموں کے ساتھ ورلڈ کپ کوالیفائرز میں حصہ لینا ہوگا جس میں دو ٹیمیں ورلڈ کپ کے لیے کوالیفائی کریں گی ۔
پاکستانی ٹیم کے لیے موجودہ صورتحال اچھی نہیں ہے ورلڈ کپ کے بعد اسے انگلینڈ ، نیوزی لینڈ اور بنگلہ دیش کے خلاف ون ڈے سیریز میں شکست ہوچکی ہے اور وہ صرف سری لنکا اور دو بار زمبابوے سے سیریز جیتنے میں کامیاب ہوسکی ہے اور آنے والے مہینوں میں اسے انگلینڈ اور پھر آسٹریلیا جیسی دو بڑی ٹیموں سےانھی کے میدانوں میں مقابلہ کرنا ہے ۔
آسٹریلیا اور نیوزی لینڈ میں گذشتہ سال ہونے والے ورلڈ کپ سے قبل پاکستانی ٹیم کی عالمی رینکنگ چھٹی تھی ۔
ورلڈ کپ کے بعد مصباح الحق اور شاہد آفریدی نے ون ڈے کرکٹ کو خیر باد کہا اور ٹیم کو ازسر نو تیار کرنےکے خیال سے کپتانی اظہر علی کو سونپی گئی لیکن ان کی قیادت میں ٹیم خاطرخواہ نتائج دینے میں کامیاب نہیں ہوسکی ۔
ون ڈے اور ٹی ٹوئنٹی میں ٹیم کی متواتر ناکامیوں کا نزلہ کوچ وقار یونس پر گرا جنھیں ورلڈ ٹی ٹوئنٹی کپ کے بعد اپنے عہدے سے استعفی دینا پڑا ۔
ورلڈ کپ کے بعد بہتر کامبینیشن کی تشکیل کے نام پر سلیکشن کمیٹی نے کئی کھلاڑی آزما ڈالے لیکن ون ڈے اور ٹی ٹوئنٹی ٹیم ابھی تک اپنے پاؤں پر کھڑی نہیں ہوسکی ہے ۔ پچھلے ایک سال کے دوران نو کھلاڑی ون ڈے اور دس ٹی ٹوئنٹی میں آزمائے جا چکےہیں ۔
محدود اوورز کے برعکس ٹیسٹ میچوں میں پاکستانی ٹیم کی کارکردگی متاثر کن رہی ہے اور یہ اسی کا نتیجہ ہے کہ وہ عالمی رینکنگ میں چوتھے درجے سے ترقی کرتے ہوئے تیسرے نمبر پر آ گئی ہے ۔

 

کونسی نئی بات ہے۔ پاکستانی ٹیم یہ چاہتی ہے کہ قوم کھیل پر اپنا ٹائم ضائع نہ کرے بلکہ تعمیراتی سرگرمیوں میں وقت لگائے۔