نعت رسول اکرم از۔۔ عثمان غنی آسؔی

مصطفٰی پیارے کی عظمت کا ہے چرچا ہر طرف
اور انہیں کے دین کا بجتا ہے ڈنکا ہر طرف

ہو لبوں پر مدحتِ شاہِ عرب کی چاشنی
اور آنکھوں کو نظر آئے مدینہ ہر طرف

یارسول اللہ ہم پر کیجئے نظرِ کرم
اب بنائے جا رہے ہیں ہم نشانہ ہر طرف

فرش سے تاعرش ہر شے قابلِ دیدار ہے ہے
مکینِ گنبدِ خضرا کا جلوہ ہر طرف

دامنِ اسلام میں آئے جو بو بکر وعمر
ہوگیا عدل و صداقت کا سویرا ہر طرف

اے امام احمد رضا پھر ہے ضرورت آپ کی
نجدیت اس دور میں ڈالے ہے ڈیرا ہر طرف

ظلمتیں کفر ضلالت کی مٹیں اس دہر سے
آمنہ کے چاند کا پھیلا اجالا ہر طرف

جب بڑھایا آپ کے اصحاب نے اپنا قدم
گاڑ ڈالا فتحِ نصرت کا پھریرا ہر طرف

پھول ہونٹوں پر تبسم کے کھلائے آپ نے
بچیوں کو زندگی کا دے کے تحفہ ہر طرف

صفحہء ہستی سے آسؔی مٹ گیا نامِ یزید
ہیں حسین ابنِ علی کے نام لیوا ہر طرف

 

بہت خوب ۔ بہت مضبوط کلام ۔ ماشاءاللہ

 

بہت خوبصورت کلام ہے ماشاء اللہ

انتہائی معذرت کے ساتھ
میرا ذاتی نظریہ ہے کہ نعت کو نعت ہی ہونا چاہئے مدح و توصیفِ ائمہ کبار و اصحاب رسول صلى الله عليه وسلم اور بزرگانِ دین کی تعریف جو منقبت کہلاتا ہے کو نعت کا حصہ نہیں ہونا چاہئے کیوں کہ میرے آقا کی برابری کوئی نہیں کر سکتا آقا صلى الله عليه وسلم کی صفات بیان کرنے کے لئے ہی ساری دنیا کے الفاظ کم ہیں اور بحث و تمحیص بالا تراحمد رضا میرے آقا کے پیروں کی دھول بھی نہیں نعتیہ کلام بحث مسالک سے پاک ہونا چاہیے

 

آپ کی محبتوں کا شکریہ بھائی جان
شاد و آباد رہیں