میں ڈھونڈتا ہوں جسے آج بھی ہوا کی طرح

میں ڈھونڈتا ہوں جسے آج بھی ہوا کی طرح
وہ کھوگیا ہے خلا میں میری صدا کی طرح

نہ پوچھ مجھ سے میرا قصہ زوال جنوں
میں پانیوں پہ برستا رہا گھٹا کی طرح

تمام عمر رہا ہوں میں جسم میں محصور
تمام عمر کٹی ہے میری سزا کی طرح

اتار دے کوئی مجھ پر سے یہ بدن کی ردا
کہ مار ڈالے مجھے بھی میرے خدا کی طرح

نکھرتا جائے یونہی رنگ شام اے پاشی
بکھرتا جاؤں یوں ہی میں گل نوا کی طرح
( کمار پاشی )