منقبت ام المومنین حضرت عائشہ صدیقہ رضی اللہ عنہا

کس طرح آپ کی ہو بیاں شان عائشہ
جب مدح گو ہے آپ کا ، قرآن عائشہ

دین خداے پاک کا فیضان عائشہ
باغ رسول پاک کا ریحان عائشہ

ہر ذی شعور کو نہیں ادراکِ مرتبہ
یہ مت سمجھنا ، ہیں بہت آسان عائشہ

بعد نبی کی آپ نے امت کی رہبری
اسلام پر ہے آپ کا احسان عائشہ

اللہ نے مصطفا کے لیے منتخب کیا
سرکار کی ہیں آپ ، دل و جان عائشہ

شوہر نبیِ پاک تو صدیق ہیں پدر
کیا نسبتیں ہیں آپ کی ذی شان عائشہ

بخشی گئی ہے آپ کو وہ قدر و منزلت
اہل جہاں ہیں سوچ کے حیران عائشہ

کیا خوب ہو جو قوم کی خود دار عورتیں
رکھیں کتاب زیست کا عنوان عائشہ

سایہ فگن ہے ہر گھڑی مانند آسماں
ملت پہ تیرے فضل کا دامان عائشہ

تو ہو کہ ہوں علی مجھے دونوں عزیز ہیں
پائندہ باد ہے مرا ایمان عائشہ

ارفق کی کیا مجال کہ یہ کر سکے رقم
اشعار تیری شان کے شایان عائشہ

احمد رضا فہر قادری (ارفق)
قصبہ پورن پور ضلع پیلی بھیت، یوپی، انڈیا

​

 

اللہ اللہ۔ سبحان اللہ۔ بہت اعلی

 

شکریہ جزاک اللہ خیرا کثیرا۔۔۔۔۔۔۔۔۔۔حضور